ल्वापु छिउँ वंम्ह प्रहरीयात स्यानाबिल

येँ(सन्ध्या टाइम्स)/गुल्मीया नयाँगाउँ धइगु थासय् वंगु चान्हय् प्याखं क्यनेगु झ्वलय् निगू पक्षया दथुइ जूगु ल्वापु नियन्त्रण यायेत वंम्ह छम्ह प्रहरीयात खुकुरीं पालाः स्याना बिउगु दु। निगू पक्ष दथुइ जूगु ल्वापुइ प्रहरीयात खुकुरीं पाला बिउगु खः।
उगु खुकुरी प्रहारय् लानाः अनया प्रहरी चौकीया प्रहरी जवान सुर्यबहादुर थापा सीगु खः। २८ दँ दुम्ह थापाया छेँ धाःसा अर्घाखाँची खः। सराय नांगु प्याखं क्यनेगु झ्वलय् स्थानीय मनूतय् दथुइ ल्वापु जूगु खः। ल्वापु नियन्त्रण यायेत प्रहरीं लाठीचार्ज याःगु खःसा वहे इलय् लिउनें खुकुरीं पालाः थापायात घाःपाः याना बिउगु खः। लिपा अस्पताल यंकूगु इलय् थापा सीगु खः। उगु घटनाय् ल्हाः दुगु आशंकाय् प्रहरीं प्यम्हेसित ज्वना तःगु दु।