प्रतिव्यक्ति आय ३,००० डलर थ्यंके'

येँ(सन्ध्या टाइम्स)/थौंकन्हय् ४०० डलर थ्यनाच्वंगु नेपाःमितय् प्रतिव्यक्ति आययात आः ३,००० डलर थ्यंकेगु ताः तयाः ज्या याये माःगु खँ प्रधानमन्त्री डा. बाबुराम भट्टराईनं धयादीगु दु।
गैरआवासीय नेपाली संघया थौं जूगु न्याक्वःगु तःमुँज्याया उलेज्या यासें प्रम भट्टराईनं थ्व खँ धयादीगु खः। विश्वया थीथी देशय् च्वनाः थीथी कथंया ज्या यानाच्वंपिं गैर आवासीय नेपाःमितय्त वय्कलं नेपालय् वयाः ढुक्क जुइक लगानी यायेत नं आह्वान यानादिल। वय्कलं धयादिल, 'नेपालय् लगानी यायेगु थाय् मदु धयादी मते। नेपाः, भारत व चीनया मनूत छथाय् तल धाःसा विश्वया ३५ प्रतिशत जनसंख्या बने जुइ। थ्व ति बांलाःगु लगानी अवसर मेगु छु दइ?' वय्कलं गैर आवासीय नेपाःमितय्त विदेशय् च्वनाः नेपाःया दूत कथं ज्या यायेत नं इनाप यानादिल।
आर्थिक विकास मजुइकं देशय् स्थायी शान्ति नं वइ मखु धासें वय्कलं थुकिया लागिं आः याकनं हे शान्ति प्रक्रिया व संविधान च्वज्या क्वचायेके त्यनागु खँ नं कनादिल। वय्कलं धयादिल, 'आः निलाया दुने हे न्हूगु संविधानया खाका जारी जुइ।'
राजनीतिक व जातीय रुपं विभाजन
गैरआवासीय नेपाली संघया महाधिवेशनया झ्वलय् थुगुसी न्हूगु नेतृत्व नं ल्यइगु जूगु दु। न्हूगु नेतृत्व ल्ययेत उम्मेदवारी बीगु ज्या न्ह्यानाच्वंगु दु। न्हूगु नेतृत्व ल्ययेगु ज्याय् थुगुसी राजनीतिक जक मखु जातीय रुपं नं विभाजन जुइगु सम्भावना ब्वलनाच्वंगु खँ धाःगु दु।