निगुलिं पक्षया भेला स्थगित

माओवादीया ल्वापु ज्यनीन १७ गते केन्द्रीय बैठक
येँ(सन्ध्या टाइम्स)/एकीकृत माओवादी दुने लाइन संघर्ष तच्वया वनाच्वंगु इलय् पार्टीया संस्थापन पक्ष व मोहन वैद्यया असन्तुष्ट पुचलं ब्यागलं ब्यागलं सःतातःगु राष्ट्रिय कार्यकर्ता भेला स्थगित याःगु दु। निगुलिं पक्ष भेला स्थगित यायेत सहमत जूगुलिं स्थगनया सुचं नं जारी याःगु दु।
थौं सुथय् च्वंगु माओवादीया केन्द्रीय पदाधिकारी बैठकं संस्थापन पक्ष व उपाध्यक्ष मोहन बैद्य पक्ष निगुलिं पक्षं ब्यागलं ब्यागलं सःता तःगु थःथःगु पक्षया केन्द्रीय प्रशिक्षण भेला स्थगित यायेगु निर्णय याःगु खः। खास यानाः वइगु २८ गते बैद्य पक्षं व २९ गते संस्थापन पक्षं थःथःगु पक्षया कार्यकर्तातय् केन्द्रीय प्रशिक्षण भेला सःतातःगु खः। संस्थापन पक्षं राज्य समिति स्तर तकया कार्यकर्तातय्त शान्ति व संविधानया बारे प्रशिक्षण बीत धकाः भेला सःतूगु खःसा उकिया विरोधय् बैद्य पक्षं छन्हु न्ह्यः हे थःगु पक्षया मेगु भेला सःतूगु खः।
पार्टीया अध्यक्ष प्रचण्डया छेँय् थौं सुथय् च्वंगु केन्द्रीय पदाधिकारीतय् बैठकं केन्द्रीय कमिटीया बैठक कार्तिक १७ गते च्वनेगु निर्णय नं याःगु दु। अथे हे बैठकं राजीतिक सहमतिया नितिं राजनीतिक दलया शीर्ष नेतातलिसे वार्ता यायेगु झ्वलय् पार्टीया वार्ता पुचलय् फुक्क पक्षया दुजःत दुथ्याकेगु सहमति नं याःगु दु।
माओवादी अध्यक्ष प्रचण्डं लिपांगु इलय् न्ह्यःने लाःथे यानाः वार्ता पुचःयात तकं बेवास्ता याना वयाच्वन धकाः बैद्य पक्षं द्वपं बिया वयाच्वंगु दु। माओवादीया वार्ता पुचलय् अध्यक्ष प्रचण्ड, स्वम्ह उपाध्यक्षपिं बैद्य, डा. बाबुराम भट्टराई, नारायणकाजी श्रेष्ठ प्रकाश, महासचिव रामवहादुर थापा बादल, सचिवपिं सीपि गजुरेल व पोष्ट बहादुर बोगटी दुथ्याकातःगु दु। माओवादीया थौं च्वंगु केन्द्रीय पदाधिकारीया उगु बैठकं नेपाःया राष्ट्रिय संवत नेपाल् संवत ११३२ न्हूदँया लसताय् वइगु कार्तिक १० गते पार्टीपाखें हे भिंतुना कालबिल नापं तुच्चा ज्याझ्वः यायेगु निर्णय नं याःगु दु।
फुक्क कार्यकर्ता लिहां वयेमाल
एकीकृत माओवादीया संस्थापन पक्षं थ्वहे वइगु असोज २९ गते यायेगु धयातःगु केन्द्रीय प्रशिक्षण भेला स्थगित यायेगु निर्णय यायेवं उगु भेलाय् ब्वति काये धकाः वयाच्वंपिं फुक्कं कार्यकर्तात अथें लिहां वने माःगु दु। भेलाय् पार्टीया जिल्ला स्तरया इन्चार्ज, सेक्रेटरी सकलें सःता तःगु खःसा केन्द्रीय पदाधिकारीया बैठकं निगुलिं पक्षया भेला स्थगित यायेगु धकाः निर्णय यायेवं सकलें लिहां वंगु खः।