स्वनिगःया ट्राफिक व्यवस्था सुधार यायेत प्रमया निर्देशन
स्वनिगःया सवारी चालकत न्हिया न्हिथं जुइगु सतक जामया हुनिं हैरान जुयाच्वंगु इलय् प्रधानमन्त्री डा. बाबुराम भट्टराईं स्वनिगःया ट्राफिक व्यवस्थापन चुस्त यायेत निर्देशन बियादीगु दु ।
प्रधानमन्त्री भट्टराईं श्रम तथा यातायात व्यवस्था मन्त्रालयया सचिव रामहरि अर्यालया उपस्थितिइ महानगरीय ट्राफिक प्रमुख डिआईजी गणेशराज राईयात अज्याःगु निर्देशन बियादीगु खः ।
बुधवाः सिंहदरवारस्थित प्रधानमन्त्री ज्याकूथी सःता निर्देशन बिइगु झ्वलय् प्रधानमन्त्री भट्टराईं ट्राफिक नियम उल्लंघन याइपिंत कडा कारवाही यायेत इनाप यानादिल । नापं वय्कलं विशिष्ठ व्यक्तितय् सवारीया इलय् ट्राफिक जाम मयासें सवारी आगमनया व्यवस्था यायेत नं निर्देशन बियादिल ।
उगु इलय् डिआईजी राईं स्वनिगलय् देय्न्यंकया च्यागू लख सवारी साधन आवगमन जुयाच्वंगु जानकारी बियादिल । वय्कलं स्वनिगः दुने मुक्कं ९ सय खुइन्याम्ह जक ट्राफिक प्रहरी जक दुगुलिं ट्राफिक व्यवस्था यायेत जनशक्ति अप्रयाप्त जूगु धयादिल ।
(किपा : प्रधानमन्त्रीया ज्याकूथी)
