भूटानय् जुजुया इहिपा न्ह्यः बम
येँ(सन्ध्या टाइम्स)/ भूटानया जुजु जिग्मे खेसर नामग्याल वाङचुकया इहिपा जुइ स्वन्हु न्ह्यः लाकाः भूटान दुने निगः बम विष्फोट जूगु दु। जुजु खेसरया इहिपाया मू ज्याझ्वः कंस विहीवाः जुइत्यंगु दुसा म्हिगः अनया फुन्सोलिङ धाःगु थासय् निगः बम विष्फोट जूगु खः। उकी लानाः निम्ह नागरिक घाःपाः जूगु दु। थ्व विष्फोटय् नेपालय् केन्द्र दुगु भूटान टाइगर्स फोर्स व भूटानया माओवादी पार्टीया ल्हाः दयेमाः धकाः भूटानी प्रहरीं अनुमान याःगु दु। थ्व विष्फोटं यानाः इहिपा कुन्हु तःधंगु आक्रमण जुइफु धइगु संकेत बिउगु खँ नं धाःगु दु।
३१ दँ दुम्ह जुजु खेसरं २१ दँ दुम्ह मय्जु जेत्सुन पेमायात इहिपा यायेत्यंगु दु। अक्सफोर्डय् ब्वनावःम्ह ल्याय्म्हम्ह जुजुया थ्व इहिपायात भूटानय् उत्सुकतापूर्वक पियाच्वंगु दु।
