मोहनिजःछि सुनां सुयातं हे नाप मलाः

येँ(सन्ध्या टाइम्स)/प्रधानमन्त्री डा. बाबुराम भट्टराईनं शान्ति व संविधानया ज्या सुथां लाकेत थःपिं मोहनिया इलय् नं सुम्क च्वने मखु व थ्व बारे ज्या न्ह्याकां तुं च्वने धयादीगु खः। तर मोहनि नखःजःछि वय्कलं शान्ति व संविधानया ज्या यायेगु ला त्वःता हे छ्वये, छुं पार्टीया सुं नेतायात नाप तकं मलाःगु खँ सीदुगु दु।
मोहनिजःछि फुक्क हे नेतात नखः हनेगुली हे व्यस्त जूवंगुलिं प्रम भट्टराईनं सुं छम्हेसित हे नाप लाये मखंगु खँ धाःगु दु। न्हापा लिपा जूसा मोहनिया इलय् तुं नेपाली कांग्रेस व एमालें तुच्चा ज्याझ्वः याइगु खःसा अज्याःगु ज्याझ्वलय् जूसां थीथी पार्टीया नेतात नापलाइगु खः। तर थुगुसी कांग्रेस व एमाले निगुलिं पार्टीं तुच्चा मयाःगुलिं नेतातय् दथुइ अज्याःगु अनौपचारिक भेट तकं जुइ मखन।
थवंथः नापलायेगु कुतः तकं मयासे बिस्कं बिस्कं च्वनाच्वंपिं थीथी पार्टीया नेतातय्त आः छथाय् हयाः नापलाकेगु ज्या पत्रकार ऋषि धमलां यायेत्यंगु दु। धमलाया रिपोर्टर्स क्लबं थौं मोहनिया लसताय् लाकाः छगू तुच्चा ज्याझ्वः यायेत्यंगु दु। धमलाया तुच्चाय् प्रधानमन्त्री डा. भट्टराईनिसें कयाः फुक्क हे पार्टीया शीर्ष नेतातय्सं तकं ब्वति काइगु खँ धाःगु दु।
धमलां थौं न्हिनय् येँया राष्ट्रिय सभागृहय् मोहनिया तुच्चा यायेत्यंगु खः। उगु तुच्चाय् वयेगु बचं फुक्क हे दलया शीर्ष नेतातय्सं बीधुंकूगु दु। मोहनिया इलय् नं नापलानाः ज्या याये धाःपिं नेतातय् न्हापांगु भेट थौंयागु हे तुच्चाय् जुइगु खँ धाःगु दु।