माओवादी-कांग्रेस दथुइ क्वातुगु सहमति
सहमति प्रति एमाले सशंकित
येँ (सन्ध्या टाइम्स)/दिनाच्वंगु शान्ति प्रक्रिया व संविधान च्वयेगु ज्यायात न्ह्यःने यंकेगु बारे म्हिगः माओवादी व नेपाली कांग्रेस दथुइ जूगु सकारात्मक सहमतियात कयाः एमालें 'आपत्ति' प्वंकूगु दु। कांग्रेस व माओवादी जक जानाः सहमति यासें थःपिंत वेवास्ता यात धकाः एमालें अज्याःगु आपत्ति प्वंकूगु खःसा आः एमालेया नं चित्त बुझे यायेगु लागिं थौं कांग्रेसं एमालेया वरिष्ठ नेतातय्त नापलानाः म्हिगः माओवादीलिसे जूगु सहमतिया व्याख्या यायेत्यंगु दु ।
थौं न्हिनय् कांग्रेस सभापति सुशील कोइरालाया छेँय् एमाले नेतात लिसे बैठक च्वनाः थुकिया बारे थप सहलह यायेत्यंगु खँ सीदुगु दु। म्हिगः नेपाली कांग्रेस व माओवादी नेतातय् दथुइ जूगु सहलहपाखें आपालं खँय् सहमति जूगु खः। उकी शान्ति व संविधान च्वयेगु ज्यायात मेगु लछिया दुने पूवंक हे न्ह्याका वनेगु सहमति जूगु खः ।
संविधान च्वज्याय् तःधंगु पंगःया रुपय् वयाच्वंगु राज्य पुनर्संरचनाया लागिं कांग्रेसं आयोग गठन यायेमाः धकाः माग यानाच्वंगु खःसा माओवादीं विज्ञतय् पुचः जक दयेकाः ज्या न्ह्याकेमाली धयाच्वंगु खः। म्हिगःया वार्ताय् यदि माओवादीं शान्ति प्रक्रियायात न्ह्यःने यंकेगु लागिं पलाः न्ह्याकल धाःसा थःपिं विज्ञतय् पुचः दयेकेत तयार दु धकाः कांग्रेसं सहमति प्वंकूगु खः ।
म्हिगःया वार्तापाखें माओवादी व कांग्रेस शान्ति एवं संविधान च्वज्या यायेगु सवालय् तसकं सतिक लाः वःगु खँ धाःगु दु। उगु वार्ताय् माओवादीपाखें अध्यक्ष प्रचण्ड व प्रधानमन्त्री डा. बाबुराम भट्टराई पक्षधर नेतातय्सं जक ब्वति काःगु खः। पार्टीया असन्तुष्ट नेता मोहन वैद्य पक्षया सुं नं नेतायात उकी ब्वना मयंकू। कांग्रेसलिसे वार्ता याः वने न्ह्यः प्रचण्ड व डा. भट्टराई निम्ह जक च्वनाः होमवर्क याःगु खः ।
थ्व सहमतिप्रति मोहन वैद्य पक्षया नं समर्थन कायेगु लागिं माओवादीं थौं भाजु वैद्यलिसे नं वार्ता यायेगु खँ धाःगु दु। माओवादीया छगू पुचलं थौं वैद्य पुचःया नेतात नापलानाः पार्टी दुने ब्वलंगु फुक्कं कचवंत समाधान याना वनेगु बारे हे संवाद न्ह्याकीगु खँ माओवादी नेतातय्सं धाःगु दु ।
