वैदेशिक रोजगार मर्यादित व स्वच्छ दयेकि: प्रम

येँ(सन्ध्या टाइम्स)/प्रधानमन्त्री डा. बाबुराम भट्टराईं वैदेशिक रोजगार व्यवसाययात मर्यादित यायेत धासें सम्बद्ध पक्षयात निर्देशन बिउगु दु। प्रधानमन्त्री भट्टराईं वैदेशिक रोजगार व्यवसाययात व्यवस्थित, स्वच्छ व मर्यादित यायेगु निंतिं ध्यानबीत धासें सम्बन्धित पक्षतयात निर्देशन बिउगु खः।
वैदेशिक रोजगारया निंतिं वनीपिं नेपाःमितय्त ठगे यायेगु प्रवृत्ति अप्वया वनाच्वंगु धासें थुगु व्यवसाययात मर्यादित व स्वच्छ दयेकेत सम्बन्धित ख्यःया अधिकारीतय्त थःगु ज्याकुथिइ सःताः प्रधानमन्त्रीं थुकथंया निर्देशन बियादीगु खः।
प्रधानमन्त्री भट्टराईं वैदेशिक रोजगारय् वनाच्वंपिं नेपाःमितय् धलः मुंकाः ठगी ज्याय् संलग्नतय्त कारवाही यायेत व वइगु दिनय् थज्याःगु प्रवृत्ति हाकनं मजुइकेत नं निर्देशन बियादीगु खः। राज्य पक्षं अवसर बी मफुगुलिं बाध्य जुयाः नेपाःमित रोजगारया निंतिं पिहां वनेमाःगु अवस्थाय् हाकनं इमित हे ठगे यायेगु प्रवृत्ति लज्या चायापुगु जूगुलिं गुगुं नं हालतय् थज्याःगु ज्या याके बीमजिउगु व थुकियात फक्वं याकनं पनेत धासें निर्देशन बिउगु सम्बद्ध छम्ह अधिकारीं धाःगु दु।
प्रधानमन्त्री व मन्त्रिपरिषद्या ज्याकू सिंहदरवारय् सम्बद्ध अधिकारीत नापं जूगु सहलह ज्याझ्वलय् श्रम, परराष्ट्र, गृह, अर्थ मन्त्रालयया सचिव लिसें वैदेशिक रोजगार विभागया अधिकारीतय्गु नं उपस्थिति दुगु खः।