विराटया न्यय्क्वःगु सम्मेलन सम्पन्न

ख्वप(सन्ध्या टाइम्स)/विराट नेपालभाषा साहित्य सम्मेलन गुथिया न्यय्क्वःगु विराट साहित्य सम्मेलन म्हिगः ख्वपया लाय्कुली पीगुदँ तक विराट सम्मेलनय् ब्वति कयाः सिरपाः त्याकूपिं साहित्यकारपिनि रचना न्यंकाः क्वचाल। ज्याझ्वलय् विराटया गतिविधि सम्बन्धी तःजिगु किपा ब्वज्या नं जूगु खः। आः तक सिरपाः त्याकेधुंकूपिं पीम्ह च्वमितय्सं ज्याझ्वलय् रचना पाठ यानादीगु खः।
नेपाल साहित्य मन्दिरया नायः तिलक प्रकाश कायस्थया सभापतित्वय् जूगु उगु विशेष साहित्य सम्मेलनय् न्हापांगु विराट गुथिइ बाखं ब्वनादीम्ह उपन्यासकार मथुरा साय्मिंनिसें थगुनेया सम्मेलनय् सिरपाः त्याकादीम्ह बद्री बेदनां तक थःपिनि रचना न्यंकादीगु खः। न्हूपिं व पुलांपिं साहित्यकारपिनि संगम कथं जूगु ज्याझ्वः ख्वपपाखें रमापतिराज शर्मा, येँपाखें उपन्यासकार शशिकला मानन्धर व यलपाखें डा. पुष्पराज राजकर्णिकारयात दबुली ब्वनाः मथुरा साय्मिया प्रमुख आतिथ्यताय् जूगु खः।
बहनी सूर्योदय माविया सितला माजु लसय् हनाम्येँ प्याखं, बेव च्यानलया ख्यालः, भरत साय्मिया म्येँ, श्रीनाद समूहया सांस्कृतिक ब्वज्या नं जूगु खः।