मोहनि सिमधःनिवं पेट्रोलया भाः थहां वन
येँ(सन्ध्या टाइम्स)/मोहनि नखः पूवंक क्वमचाःनिवं नेपाल आयल निगमं पेट्रोलियम पदार्थया भाः थकाःगु दु। थौं सुथय् १० निसें लागू जुइ कथं निगमं पेट्रोल, डिजेल व मचिकं स्वतांया भाः थकाःगु खः। थौं सुथय् च्वंगु निगमया बैठकं पेट्रोल लिटरं स्वतका अले डिजेल व मचिकं लिटरं छतका छतका भाः थकाःगु खः। न्हूगु भाः कथं आः बजारय् पेट्रोल प्रति लिटर १०५ तका थ्यंगु दुसा डिजेल व मचिकं प्रति लिटर ७६ तका थ्यंगु दु।
थ्व मूल्यवृद्धि लिपा निगमया मासिक घाटा छुं भचा म्हो जूगु खँ निगम प्रवक्ता मुकुन्द ढुंगेलं कनादीगु दु। आः निगमयात पेट्रोलपाखें प्रति लिटर ७५ पैसा लबः वःगु दुसा डिजेलय् प्रति लिटर १० तका १ पैसा व मचिकनय् १ पैसा द्यापं लानाच्वंगु दु।
थौंकन्हय् निगमयात लछिया ८३ करोड द्यापं लानाच्वंगुली थौंया मूल्यवृद्धि लिपा निगमया घाटा ७० करोड ६० लाख तकाय् कुहां वःगु खँ नं निगमं धाःगु दु।
पेट्रोलियमया भाः थकाःसां जा थुइगु ग्याँसया भाः धाःसा थकाःगु मदुनि।
