माओवादी कुचा जूसा स्वकू जुइ
२९ गतेया भेला स्थगित यायेगु प्रस्ताव अस्वीकार
येँ (सन्ध्या टाइम्स)/एकीकृत नेकपा (माओवादी) यदि थ्व इलय् कुचा दल धाःसा थ्व पार्टी निकू कुचा मखु स्वकू कुचा जुइगु खँ विश्लेषकतय्सं धाःगु दु ।
माओवादी दुने थौंकन्हय् ब्वलनाच्वंगु कचवं तच्वया वनाः आः पार्टी कुचा हे दलीगु खः लाकि धइगु अवस्थाय् तक थ्यंगु थ्व इलय् माओवादीया आन्तरिक कलह बारे जानिफकार विश्लेषकतय्सं थज्याःगु अनुमान याना हःगु खः ।
थौंकन्हय् माओवादीया उपाध्यक्ष मोहन वैद्य किरण पक्षधर नेता कार्यकर्तातय्सं यदि थःपिनिगु खँ पार्टीया संस्थापन पक्षं मन्यन धाःसा थःपिंसं बिस्कं पार्टी चायेके फुगु खँ धायेगु याना हयाच्वंगु दु। विश्लेषकतय् अनुमान कथं छुं जुयाः मोहन वैद्य पुचलं बिस्कं पार्टी चायेकल धाःसा माओवादी दुने ल्यं दइगु अध्यक्ष प्रचण्ड व उपाध्यक्ष बाबुराम पुचः नं नापं च्वनीगु सम्भावना मदु। अध्यक्ष प्रचण्डं हे डा. बाबुराम भट्टराईयात प्रधानमन्त्री दयेकूगु खःसां सैद्धान्तिक रुपं वय्कःपिनि दथुया विवाद नं दुनें दुनें तच्वया वनाच्वंगु दु। डा. भट्टराई प्रधानमन्त्री जुइवं वय्कलं नं थः पक्षधर कार्यकर्तातय्त संगठित याना हयाच्वंगु सूत्रया दावी दु। छुं जुयाः वैद्य पुचः पार्टी त्वःताः पिहां वन धाःसा अध्यक्ष प्रचण्डया शक्ति कमजोर जुइगु व वय्कःयात बाबुराम पक्षं दवाव बी फइगु खँ नं सूत्रं धाःगु दु। उगु अवस्थाय् डा. बाबुराम व अध्यक्ष प्रचण्डया नं अलग अलग पार्टी जू वनेफुगु अनुमान याःगु दु ।
छुं जुयाः माओवादी कुचा जुयाः स्वकू जू वन धाःसा उगु अवस्थाय् मोहन वैद्यया 'पार्टी' शक्तिशाली जुइगु खँ नं धाःगु दु। थौंकन्हय् वैद्यया पक्षय् पार्टीया महासचिव रामबहादुर थापा बादल, सचिव सीपी गजुरेल थेंज्याःपिं वरिष्ठ नेतात नं दुगुलिं वय्कःया शक्ति बल्लाइगु अनुमान दु ।
स्थगन प्रस्ताव अस्वीकार:
थ्वहे झ्वलय् आः वइगु असोज २९ गते यायेगु धकाः पार्टीं सःता तःगु राष्ट्रिय कार्यकर्ता भेला स्थगित या धकाः वैद्य पक्षं याःगु प्रस्तावयात संस्थापन पक्षं अस्वीकार याःगु दु। वैद्य पक्षं धाःसा यदि थ्व भेला स्थगित मयात धाःसा वयां छन्हु न्ह्यः थःपिंसं थःगु पक्षया कार्यकर्ता जक सःताः मेगु भेला यायेगु जुइ धकाः ख्याच्वः बियातःगु दु ।
