नेवाः राज्य मबिउसा सशक्त संघर्ष यायेगु जुइ: विराट
ख्वप(सन्ध्या टाइम्स)/विराट नेपालभाषा साहित्य सम्मेलन गुथिया लुँबुदिं कथं न्यय्क्वःगु विराट नेपालभाषा साहित्य सम्मेलनया न्हापांगु दिं म्हिगः नेवाः न्ह्यलुवातय् हनेज्या व न्वचु ज्याझ्वः क्वचाल। ज्याझ्वलय् नेवाः न्ह्यलुवा मल्ल के. सुन्दरं न्हूगु संविधानं नेवाः राज्य सुनिश्चित मयात धाःसा देशय् सत्ताय् दुपिं प्यंगू राजनीतिक दलया विरोधय् नेवाःतय्सं संविधान जारी जूगु न्हिनिसें हे सशक्त बिद्रोह याये मालीगु ख्याच्वः बियादिल। वय्कलं राज्यया हरेक निकायय् नेवाःतय्त थाय् मबिउतले नेवाःतय् आन्दोलन गबलें हे दी मखु धयादिल ।
नेपालभाषा मंकाः खलःया नायः पद्मरत्न तुलाधरं लण्डनय् विश्व न्यंकंया नेवाःत मुनेगु निंतिं जागरुक जुयाच्वंगु इलय् स्वनिगः व विशेष याना ख्वपया नेवाः जातिया मनूत जागरुक जुइ मफुगु खँय् दुःख प्वंकादिल। विराट गुथिया पुलांम्ह नायः व नेवाः देय् गुथि नेपालमण्डलया पुलांम्ह नायः नरेन्द्रभक्त हाडां नेमकिपां वर्ग संघर्षया जक खँ ल्हानाच्वंगु तर विराटं वर्गीय मुक्तिया नापं उत्पीडित समुदायया उत्थानया निंतिं नं सः थ्वयेकाच्वंगु खँ कनादिल ।
विराट गुथिया संस्थापक न्ह्यलुवा रत्नगोपाल साँय्जुं उलेज्या यानादीगु उगु ज्याझ्वलय् नेपाल साहित्य मन्दिरया नायः तिलकप्रकाश कायस्थ, नेवाः देय् दबूया नायः नरेश ताम्रकार, न्ह्यज्या खलः थिमिया नायः कृष्णमोहन जोशी, नेवाः देय् गुथि नेपालमण्डलया नायः मोहनबहादुर महर्जन, विराट गुथिया सल्लाहकार डा. योगेन्द्र प्रधान, प्राज्ञ सुलोचना मानन्धर, ईलोहं प्रकाशनया नरेशवीर शाक्य, मिसा न्ह्यलुवा डा. चुन्दा बज्राचार्य व नेपालभाषा मंकाः खलः यलया नायः किरण शाक्यपिंसं विराटं न्ह्याकाच्वंगु बागू सदीया नेपालभाषा आन्दोलनया थीथी पक्षयात कयाः ध्वाथुइकादीगु खः ।
ज्याझ्वलय् नेवाः जाति, नेपालभाषा साहित्य व कला संस्कृतिया उत्थानया लागिं ज्वःमदुगु ज्या यानादीपिं स्वनिगःपाखें नातिवज्र वज्राचार्य, पश्चिमाञ्चलपाखें पोखराया प्रकाशमान पालिखे, पूर्वाञ्चलपाखें विराटनगरया सुदर्शनबहादुर श्रेष्ठपिंत विराटया नायः त्रिरत्न शाक्य व रत्नगोपाल साँय्जुपिंसं दोसल्लां न्ययेकाः ख्येँ सगं बियाः हनेज्या यानादीगु खः। गुथिया नायः त्रिरत्न शाक्यं लसकुस यानाः न्ह्याकूगु उगु ज्याझ्वलय् थुगुसी एसएलसीइ नेपालभाषा विषयय् दकलय् अप्वः ल्याः हयादीम्ह परोपकार उमाविया जुनु दिपकरयात नेपालभाषा पदक लःल्हाःगु खः ।
ज्याझ्वलय् थगुने जूगु सांस्कृतिक विधाय् न्हाप लाःगु सूर्योदय सेकेण्डरी स्कूल, लिउ लाःगु कविता खुसुया हुलाप्याखं, लियांलिउ लाःगु कन्या सह शिक्षा माविया हुलाप्याखं व हःपाः लाःगु फ्यूचरस्टार सेकेण्डरी स्कुलयात नं विराट सांस्कृतिक सिरपाः लःल्हाःगु खः ।
ज्याझ्वःया दथुइ दथुइ सूर्योदय सेकेण्डरी स्कुल, याछेँ नौबाजा खलःया धून व राजेन्द्र श्रेष्ठया म्ये नं न्ह्यब्वःगु खः। थौं पीगुक्वः तक जूगु विराट सम्मेलनय् सिरपाः त्याके धुंकूपिं च्वमि साहित्यकारपिंत दुथ्याकाः साहित्य सम्मेलन नापं बहनी सांस्कृतिक ब्वज्या जुइ ।
