तोखाय् शस्त्र परित्याग दिवस हन

तोखा (सन्ध्या टाइम्स)/थनिं २२७३ दँ न्ह्यः सम्राट अशोकं शस्त्र परित्याग यानाः अहिंसाया पक्षय् अभियान सुरु यानादीगु न्हियात लुमंकाः थेरवाद बौद्ध दायक केन्द्रीय परिषद् व थनया बुद्धभूमि महाविहार परिवारया मंकाः ग्वसालय् 'शस्त्र परित्याग दिवस' हनेगु ज्या जुल।
धम्मानुशासक सद्दातिस्स भन्तेपाखें पञ्चशील ग्रहण यासें न्ह्याकूगु उगु ज्याझ्वलय् डा. सानुभाई डंगोलं सम्राट अशोकं शस्त्र परित्याग यानाः बुद्ध धर्मयात विश्वव्यापीकरण याःगु ज्याखँ बारे ध्वाथुइक कनादिल।
डा. लक्ष्मण शाक्यं छताजिया विनाशं मेताजिया विकास सम्भव मजुइगु खँ कनादिल।
परिषद्या महासचिव बिष्णुरत्न शाक्यं धर्मया नामय् हिंसा याना जुइगु पाय्छि मखु धासें थ्व धर्मया रुप मखु धयादिल। भिक्षु कोलितं थःत मयःगु खँ मेपिंत नं यइ मखु धइगु खँ थुइकाः न्ह्यःने वनेमाःगु खँ कनादिल। परिषद्या नायः बखतबहादुर चित्रकारं सम्राट अशोकया कारणं हे सिद्धार्थ गौतम बुद्ध नेपालय् जन्म जूगु खः धइगु खँ पुष्टि जूगु खँ कनादिल। ज्याझ्वलय् बुद्धभूमि महाविहारया उपासक सानुकान्छा डंगोलं लसकुस यानादीगु खः।