प्रचण्डया अबु मंत

येँ(सन्ध्या टाइम्स)/एकीकृत माओवादीया अध्यक्ष पुष्पकमल दाहाल प्रचण्डया अबु मुक्तिराम दाहाल मंत। वय्कः ८५ दँ दुम्ह खः। भाजु दाहाल वंगु चान्हय् मदुगु खः।
भरतपुरया वैदिक नगरय् च्वंगु थःगु हे छेँय् च्वनाः वासः याका च्वनादीम्ह वय्कः छेँय् हे मदुगु खः। छुं दिं न्ह्यवंनिसें च्व फायेगु सम्बन्धी ल्वचं कयाः उसाँय् मदयाच्वंम्ह वय्कःयात निला तक येँया जनमैत्री अस्पताल व अन्नपूर्ण अस्पतालय् वासः याकूगु
खः। येँय् वासः यानाः छुं भचा सुधार जुइवं वंगु छवाः न्ह्यःनिसें वय्कः भरतपुरया थःगु हे छेँय् च्वनादीगु खः।
मदुम्ह दाहालयात थौं हे देवघाटय् अन्त्येष्टि यायेधुंकूगु दु। दाहसंस्कारया निंतिं माओवादी अध्यक्ष प्रचण्ड लिसें मेपिं छेँजःपिं नापं प्रधानमन्त्री डा. बाबुराम भट्टराई व माओवादीया नेतात थौं सुथय् चितवनपाखे वंगु खः।