पार्टी दुने ब्यागलं पार्टी
बैद्य पक्षया खँ मन्यँसे न्ह्याः वनेगु संस्थापन पक्षया नीति
येँ (सन्ध्या टाइम्स)/लाइन संघर्षया झ्वलय् झनझन ल्वापु तच्वया वनाच्वंगु एकीकृत माओवादी दुने आः 'पार्टी दुने पार्टी व योजना दुने योजना' धइगु न्हूगु कथंया रणनीति दयेकेगु ज्या जुयाच्वंगु दु ।
विशेष यानाः संस्थापन पक्ष व बरिष्ठ उपाध्यक्ष मोहन बैद्य किरण पक्ष उकथंया तयारी यानाः न्ह्याः वनाच्वंगु खँ सीदुगु दु। विशेष यानाः निगुलिं पक्षया कार्यकर्तातय्त थःथःगु पक्षय् प्रशिक्षण बीगु इलय् उकथंया निर्देशन बीगु ज्या जुयाच्वंगु नापं कार्यकर्तात नं उकथं हे न्ह्याः वनाच्वंगु खँ नं माओवादी सुत्रं धाःगु दु। माओवादी नेतातय्सं विचार समुहया नेतात धकाः थःथःगु पक्षया नेता व कर्याकर्तातय्त तयाः पार्टी दुने पार्टी दयेकेगु ज्या तीब्र रुपं न्ह्याका वनाच्वंगु खँ नं माओवादी नेतातय्सं हे स्वीकार यानादीगु दु ।
संस्थापन पक्षं थ्वहे वइगु २८ गते देय्न्यंकंया राज्य समिति स्तरया कार्यकर्ता भेला येँय् यायेत्यंगु दुसा उपाध्यक्ष मोहन वैद्य पक्षं उकियात बहिष्कार याइगु जक मखु वयां छन्हु न्ह्यः थःपिनिगु ब्यागलं राष्ट्रिय कार्यकर्ता भेला येँय् यायेगु धकाः घोषणा याःगु दु। २८ गतेया भेलायात संस्थापन पक्षं पार्टीया हे कार्यकर्ता भेला धाःसां बैद्य पक्षं धाःसा थःपिंलिसे सहलह हे मब्याकुसे यकःति कथं उगु भेला सःतूगु द्वपं बिसें वयां छन्हु न्ह्यः थःपिनिगु ब्यागलं कार्यकर्ता भेला सःतूगु खः। निगुलिं पक्षं राज्य समिति स्तर तकया नेता व कार्यकर्तात दुथ्याइ कथं समानान्तर भेला सःतूगुलिं माओवादी समर्थक व शुभचिन्तकत चिन्तित जूगु दु ।
थ्व हे दथुइ संस्थापन पक्षं आः बैद्य पक्षया खँ मन्यँसे हे पार्टीयात न्ह्याका यंकेगु रणनीति दयेकूगु दु। वैद्य पक्षयात कारवाही यात धाःसा पार्टी तज्याये फुगु जूगुलिं आः वैद्य पक्षयात मौन रुपं अस्वीकार यायां न्ह्याः वनेगु रणनीति दयेकूगु खँ माओवादीया छम्ह नेतां धयादीगु दु। उखे पार्टी दुने ब्यागलं विचार संघर्ष यानाच्वंगु प्रम डा. बाबुराम भट्टराई पक्षधरया नेतात नं आः वयाः सक्रिय जुयावःगु दु। बाबुराम पक्षया थ्व सक्रियतां पिनें स्वयेबलय् प्रचण्ड व बाबुराम छगू हे पक्षय् थें खने दुसां दुनें दुनें धाःसा वय्कःपिनि दथुइ नं स्पष्ट विभाजन दनि धइगु खँ पुष्टि याना बिउगु दु ।
