विराट नेपालभाषा साहित्य सम्मेलन गुथिया लुँबुन्हि

बागू शताब्दी न्ह्यः निसें 'जातीय स्वतन्त्रतायात क्वतेला राष्ट्रिय उत्थान जुयेफइमखु' धइगु नारा लिसें दँयदसं यानाच्वंगु विराट नेपालभाषा साहित्य सम्मलेन गुिथं थौं थःगु न्ययदँ बुन्हि (लुँबुन्हि) हंसे थुगुसीया विराट नेपालभाषा साहित्य सम्मेलनया उलेज्या यात । थौं व कन्हय् निन्हुयंकं जुइगु थुगु सम्मेलन थौंया ज्याझ्वः गुथिया संस्थापक भाजु रत्नगोपाल साँय्जुं त्वाःदेवाय् मत च्याकाः ज्याझ्वःया उलेज्या यानादीगु खः ।

ख्वपया लाय्कुलिई जूगु थुगु ज्याझ्वलय् नेपालभाषाय् ज्वःमदुगु योगदान यानाच्वनादीपिं ब्यक्तिपिंत हनादीगु खः । थथे हनादीपिं व्यक्तिपिं स्वनिगलं येँय्या भाजु नातिबज्र वज्राचार्य, पश्चिमान्चलं पोखराया भाजु प्रकाश पालिखे व पूर्वान्चलं विराटनगरया भाजु सुदर्शन बहादुर श्रेष्ठपिं खः । वय्कःपिंत गुथिया संस्थापक भाजु रत्नगोपाल साँय्जुं तःकःतपुलिं पुइकाः बेतलिं चिकाःदीगु खःसा दोसल्ला गां न्ययेकाः हनादीगु खः । अथेहे वय्कःपिंत गुथिया नायः भाजु त्रिरत्न शाक्यं हनापौ नं लःल्हानादीगु खः ।

थुगुसीया एस.एल.सी. परिक्षाय् दक्कलय् अप्वः ल्याः कयादीम्ह परोपकार स्कूलया मय्जु जुनु दिपंकारयात नं हनादीगु ज्याझ्वलय् हंकाःदीपिं भाजु नातिवज्र वज्राचार्य, प्रकाश पालिखे, सुदर्शन बहादुर श्रेष्ठ व जुनु दिपंकारं नं थःथःगु नुगः खँ तयादीगु खः ।

ज्याझ्वलय् नेपाः राष्ट्रिय पार्टीया सभासद् भाजु बुद्ध सायमि, नेवाः देय् दबूया नायः भाजु नरेश ताम्राकार, नेपालभाषा मंकाः खलः येँया नायः भाजु पद्मरत्न तुलाधार, नेपालभाषा मंकाः खलः यलया नायः भाजु किरण शाक्य, नेपाल प्रज्ञाप्रतिष्ठान मातृभाषा विभागया कजि मय्जु सुलोचना मानन्धर, नेपालभाषा एकेडेमीया उपकूलपति व बाखँ दबूया नायः भाजु लक्ष्मण राजवंशी, नेपाल साहित्य मन्दिर ख्वपया नायः भाजु तिलक प्रकाश कायस्थ, ईलोहं पिकाःकया नायः भाजु नरेशवीर शाक्य, न्हयज्या खलः थिमिया नायः भाजु कृष्ण मोहन जोशी, नेवाः देय् गुथि नेपालमण्डलया नायः भाजु मोहनबहादुर महर्जन, गुथिया सल्लाहकार डा. मय्जु चुन्दा बज्राचार्य व नेवाः देय् दबूया संरक्षक भाजु मल्ल के.सुन्दरं नं थःथःगु नुगः खँ तयादीगु खः । नेकपा एमालेया नेता भाजु राजेन्द्र श्रेष्ठं म्ये हाला न्यंकादीगु खः ।

गुथिया नायः भाजु त्रिरत्न शाक्यजुं लुसकुस यानादीगु थौंया न्हापांगु ज्याझ्वः संस्थापक भाजु रत्नगोपाल साँय्जुया सभापतित्वय् जूगु खःसा भाजु महेन्द्र गोपाल कर्माचार्यं न्हयाकादीगु खः ।

गुथिया कन्हय्या ज्याभ्वःलय् थ्व स्वयां न्ह्यः दँय्दसं साहित्य धेंधें बल्ला कासा यानावयाच्वंगुलिइ न्हाप लानाच्वंगु साहित्यत ब्वनेगुया लिसें थीथी साँस्कृतिक ज्याझ्वःत जुइगु ग्वसाखलकं जानकारी ब्यूगु दु ।

ज्याझ्वःया किपाया लागि थन क्लिक यानादिसँ

News Location:

Related Stories

विराटं स्वम्हेसित हनीगु
विराट नेपालभाषा साहित्य सम्मेलन गुथिं स्वम्हेसित हनीगु
विराटया पुनर्मिलन
क्वाठण्डौंय् विराट
विराटया लुँबुदिं तःजिक हनेगु तयारी