राजनिति मसिउम्ह काय्

सौरभ शाक्य
जिमि चिधिम्ह काय् राजनितिया बारे सीकेत तसकं उत्सुक जुयाच्वन । वं न्हिं न्हिं धयाथें अखवार स्वइच्वन । न्हिं न्हिं छेंय् टिभिइ कार्टून जक स्वइम्ह जिमि काय्या आनिबानी हिलावंगु खनाः छेंय् जःपिं सकलें पक्क । मांम्हसिनं जितः मुसुमुसु न्हिलाःधाल,"काय् ला छिगु हे लँय् वल नि ! स्व ले अखवार हे पँ पँ, खंला मिखा हे लिमकासें स्वइच्वंगु ।"
जिं धया,"लाःसा वं रेडियोया बिज्ञापन, मोबाइलया बिज्ञापन जक स्वयाच्वंगु खःला ? कि मिस नेपाःब्युति कन्टेस्टया खबर दु अखवारय्.....। उमिगु किपातला स्वयाच्वंगु मखुला ? "
"मसिउ, छु स्वःगु गुगु स्वःगु का, पानाका पाना पुतुपुइकाः नयेथें स्वयाच्वंगु दु । मिखा हे फुति मयासें" मांम्हसिनं उकथं हे लिसः बिल । जिगु शंका काय् भाजुया लिसलं हुयाबिल । जि खनेवं कायभाजुं छवाराक्क न्यन, "बा राजनिति धइगु छु ? उलिमछिं अखवार स्वयेधुन जिं राजनिति धइगु छु खः गुगु खः मसिउनि धयां ।"
जिगु म्हुतुइ न्हिला ब्यन हरर...सुनां ख्यालिकुं कनाः न्हीका च्वंथें । जिमि काय् फिल्मया बारे, कार्टुनया बारे मन्यंसें राजनितिया बारे न्यंगु खनाः छकः ला ! गजब नं चाल । जि लय्तायाःधयाः,"राजनिति धइगु सत्ता प्राप्त यानाः जनतायात निगु भिंगु शासन बीगु खः, जनताया भलाई यायेगु खः, तर थौंकन्हय् राजनिति यायेगु धइगु थःत सुख चैन आनन्द कयाः जनतायात दुःख पीर, थिके, आतंक अत्याचार, अब्यबस्था बियाच्वन, थ्व मखु राजनिति " । जिगु खँ न्यनाः काय् ताःहाक झसुकाः तल । जिं छम्ह क्याम्पसया राजनितिशास्त्रया प्राध्यापकं थें लेक्चर बिया, "स्व बाबु सत्ता हे राजनितिया मुहान खः सुं नं राजनितिक पार्टि सत्ता प्राप्त यायेत सनिगु थ्व हे कारण खःकि सत्ताय् वनाः थम्हं देश व जनताया भलाइ थःगु निति कथं यायेगु खः"
"अले थ्व जुलूस, हडताल, मशाल, बन्द छु लय् ? " जिमि कायं न्ह्यसः छुत ।
जिं धया, "थ्व बन्द, मशाल धइगु बिरोधया सः खः बांलागु या, भिंगु या धइगु दबाव खः। थ्व जुलुसया लिउने नं जनता हे खः । अले प्रचण्ड, माधब, शेरबाहादुर, शुसिल फुकसियां चाहना जनताया भिं खः देशया भिं खः, सुशासन खः, लँ पाः आज्जु पाः, जनता ला व हे खः" कायं छ्यं ल्हुकुल्हुकु यानाः न्यनाच्वन जिगु खँ ।
"बा, अय्सा राजनिति धइगु थु हे मथूनि धाःसां जिउ जिं । जितः छम्ह पासां धाःगु का, थौंकन्हय् ध्यबा कमे यायेगु अःपुगु लँ हे राजनितिइ वनेगु हँ ! राजनिति वंपिसं कमिशन, घूस, जक ननं चां चां हे बंगला,मोटर, बैंक ब्यालेन्स दयेके फु हँ ! अले देशय् सुं तःमिपिं दुसा व राजनितिज्ञत हे खः हँ ।" जिमि काय् थम्हं न्यनागु खँ खुरुखुरु कन । जिं धया," राजनिति धइगु थौं वयाः ब्यापार जुयाबिउगु दु , फोहर जुयाबिउगु दु, सुयां दलाल जक मखु, देश बिरोधी बिदेशी दलाल जुयाबिउगु दु , थःत जक फाइदा जुइगुसा देश मीत नं लिफः मस्वइपिं दु, तर बावु राजनिति फोहर मखु फोहरी राजनितिज्ञत खः । वास्तवय् सहि खँ राजनितिया मू उदेश्य, तातुना देश व जनतायात भिं यायेगु खः बिकास यायेगु खः देशय् सुशासन हयेगु खः, देशय् अमन चैन कायम यायेगु खः । राजनितिया तप्यंगु परिभाषा थ्व खः " जिं बछि आबेशय् बछि नाइक धया । जिगु खँ न्यनाः जिमि काय् ज्यः जुल शायद वं राजनिति धइगु थुल जुइमाः, सिल जुइमाः ।
जिमि काय् हानं अखवार स्वयेगु त्वःताः टिभिइ कार्टुन फिल्म स्वयेगुलिइ ध्यान तयाहल । हानं छेंय्यापिं फुक्कं गजब जुल, छक्क जुल जिमि काय्या तालं । जि न्हिलेबःछि मन्हिले बछि ख्वाः ज्यानाः च्वंच्वना, थुलि याकनं काय्या राजनितिपाखें मोहभंग जूगु खनाः । छन्हु मांम्हेसिनं न्यनाच्वन काय्याके "बाबु छं अखवार स्वयेगु त्वःतल नि छाय् ?"
"छाय् छाय् बाःयाके न्यं !"
थुलि धयाः काय् भाजु भिडियो गेम म्हितेगुलिइ ब्यस्त जुल । जिमि कलाःतं जिगु ख्वाः स्वल । जि फस्वयाः न्हिलाःबिया ।
"अखवार न्याना हये धुसेंलि कायं स्वल धकाः छितः छु पाइ हँ !" कलातं गरखेसें ख्वाःतया न्यंकल जितः
"जिं छु अखवार स्वयेमते बाबु, टिभिइ स्वयाच्वं ! गेम म्हिताच्वं ! धयागु दुला ! क्या.....खँखि थुइमखु पारापारा हालेवं गाः ।" जि हिचाः पहलं धया ।
"अले छाय् बाबुचां अखवार मस्वल " कलाः जाःलिसा कें लिसा काये थें यक्वः हाल ।
"ई बाःमांपिं ला निगति खँय् नं कचकच यानाच्वनी ! जितः अखवार स्वये मयःका हुँ ! कर दुला ! एक मयः दुइ मयः तिन मयःकाःहुँ ! छु मयःगुया ल्वसा दु ला ? "काय् हिमिचाया हाल ।
"छाय् मयः" आः धाःसा जिपिं निम्ह त्यपूया पाःलाक सः थ्वल ।"
"जितः राजनिति धइगु हे मयः खि धकाः सिइकं छाय् अपां कयेका थःत चिचाः वयेके ! छम्हथें छम्ह झंग, फताहा, लुच्चा, भ्रस्त, खुँ, डाँका, स्वयानं भाःमरुपिं ! अजापिनिगु संगत जि छाय् वने, अजापिनिगु खँ जिं छाय् न्यं जुये"
कलाःचां खँ मथूल । जि कलाःया ख्वाः स्वयाः न्हिलाः च्वना । काय् भाजु हिचाया पहः ख्वालय् तिकाः टिभि स्वयाच्वन । कलाः छकः काय्यात स्वया, छक जितः स्वयाः वाताहां च्वनाच्वन ।

Related Stories

गधा [ ध्याचु ]
थथे नं जुइयः [ ध्याचु ]

More Stories Like this

बाखं च्वये मखुनी
परिवेश (मुक्तक बाखं)
बायावंगु लँपु
हेँग्वाः जूम्ह मनू
ब्लू-डल बाखं ब्वनेधुंकाः