लिपस्टिक

पुष्परत्न तुलाधर

गुलाब स्वांमाय्
छफ्वः गुलाब स्वां
थःगु हे नस्वालं
गुजुहुं कायेकाः
गुलाबि उं
जल्ल थिना बी
मय्जुया म्हुतीसी ।

चंचंधाःगु मिखा छज्वः
चुलुबिया कुतुवइ,
बसन्तं काःगु फसं
पुइका यने न्ह्यः
छग्वलं मिखा
नाइक फया बी
मिखाया नानी ।

हः म्हासुइभनं हलं
वाउंक छवः छी,
पलसुं छिनातःम्ह सपुरी
नच्चाम्ह मियो
सुति तिकि ननीथें
झ्यालं क्वस्वः वइ,
पुन्हिया जती ।

बुँगाःथें मिखाय्
लःलः धाःगु लखय्
थःगु हे हिसिं
खःगु लिजलाय्
क्वसिना वंम्ह वं
ल्यासेसू चुइकी,
बाः वःगु खुसी ।

व उंदुने उनं
छबः जक उं
दुगं ह्वया बी,
मय्जुया समा
स्याउया सालुगु पिबःथें
मिखाय् ध्वइ, थी
मय्जुया हिसी ।

मियो= मेमोयर्स अफ अ गीशा या नकिं

More Stories Like this