यल मंकाः खलःया मिसा साहित्य सम्मेलन

कीर्तिलव आनन्द जोशी
'ज्वज्वलपा' माय्कय् पूर्णिमाया सः घुन्न थ्वल। नेपालभाषा मंकाः खलः यल त्यागःया हलय् दयाच्वंगु कालकुलु सः ताये मदया वन।पाय्छि २.०५ बजे जुयाच्वन। वंगु ने.सं. ११३१ कौलाथ्व १, बुधबाः नःलास्वां पीगु न्हि कुन्हु नेपालभाषा मंकाः खलः, यलया ग्वसालय् जूगु मिसा साहित्य सम्मेलन सुरु जुल।
ज्याझ्वः न्ह्याकेगु झ्वलय् उद्घोषिका मयजू पूर्णिमां थौंया ज्या झ्वलय् "झी प्रधान सिरपाः" या संस्थापक लिसें नेपाल भाषा साहित्यय् योगदान विया वइच्वम्ह छम्ह सशत्त साहित्यकर्मी मय्जु मन्दीरा प्रधान व नेपाःया राजनैतिक व सामाजिक ख्यलय् अतिकं सक्रिय जुया योगदान वियादीम्ह व नेपाःया मिसापिनेगु उत्थानया निम्ति 'नेपाल महिला संघ' नीस्वना दीम्ह मय्जु स्नेहलता वन (लक्ष्मी प्यारी) निम्हसित हनेगु खा कनादिल।
'ज्वज्वलपा' हानं मेम्ह उद्घोषिका मीना बज्राचार्यया सः थ्वल। वय्कलं थौंया सम्मेलनय् दुथ्याःगु फुक्कं रचना 'नःलि' पत्रिकाय् छापे जुइगु सुचं वियादिल।
ज्याझ्वः कथं नेपालभाषा मंकाः खलःया लिउ दांभरि व थ्व ज्याझ्वःया कजि चमेली शाक्यं सभापतित्व ग्रहण यानादिल। अनंलि मू पाहां कथं नेपाल प्रज्ञा प्रतिष्ठानया मातृभाषा समितिया कजि सुलोचना मानन्धरयात दबुली ब्वन। अथे हे निक्वः तक सगरमाथाया च्वकाय् पलाः तयादीम्ह नेवाः मय्जु सुस्मिता मास्केयात विशेष पाहां कथं दबुली ब्वन। वयां लिपा ज्याझ्वलय् सम्मानित जुइपिं मय्जु मन्दीरा प्रधान व मय्जु स्नेहलता वनपिंत दबुली ब्वनसा अनंलि छसिकथं साहित्यकार मय्जुपिं सत्यभामा, सुवर्णकेशरी चित्रकार, नारायणदेवी श्रेष्ठ, अपर्णा प्रधान, मोतिलक्ष्मी शाक्य, डा. चुन्दा बज्राचार्य, रेवती राजभण्डारी, प्रतिसरा साय्मि, रीना वनिया तुलाधर, रुक्मणी श्रेष्ठ, मंगला कारंजित, प्रेमहिरा तुलाधर, प्रकाश प्रधानाङ्ग व कृष्णदेवी बज्राचार्यपिंत नं दबुली ब्वन।
नेपालभाषा मंकाः खलःया नायः किरण शाक्यं मोतिलक्ष्मी उपासिकाया किपाय् खादा क्वखायेकाः श्रद्धा प्वंकुसें लसकुस न्वचु बियादिल। लसकुसया झ्वलय् वय्कलं तःदँ न्ह्यः कवयित्री नारायणदेवीं छपु कविताय् 'म्ह्याय्मस्तसें नं छन्हु हिमाल गइ तिनि' धकाः च्वयादीगु स्मरण यासें वय्कलं अबलय् प्वंकादीगु उगु अभिब्यक्तियात थौं मय्जु सुस्मिता मास्कें पूवंकादीगु खँ उल्लेख यानादिल।
वयांलि कविता वाचनया ज्याझ्वः न्ह्यात। उकी न्हापांम्ह कवयित्री जुयाः दं झायादिल मय्जु रजनी मिला। मंकाः खलःया थ्व कुतःयात ऐतिहासिक ज्या धासें वय्कलं थःगु कविता 'म्हसीका' वाचन यानादिल अले छपु गजल नं न्यंकादिल।
वयां लिपा मय्जुपिं सुलोचना सैंजुं (जोशी) 'वर्षाया लखं त्वपुयाच्वंगु लँपु' कविता, लोचनतारा तुलाधरं 'जयमति' बाखं, रुपकेशरी उलकं 'वा' कविता, दिब्या ताम्रकारं 'सहानुभूति' बाखं, रेखा शाक्यं 'छ व जि' कविता, सुमा श्रेष्ठं 'ग्व गथे यानाः छन्त लसकुस याये?' कविता, सरश्वती तुलाधरं 'पोकतांगु म्हगस' बाखं, रश्मी नापितं 'जि दुनेया जि' कविता, विमलप्रभा बज्राचार्यं 'बायावंगु लँपु' बाखं, कृष्णदेवी बज्राचार्यं 'विचरा जि कविता' कविता, अमेरिकाय् च्वनादीम्ह ज्ञानीशोभा तुलाधरं ईमेलं छ्वया हःगु 'झीपिं झी जुइ नु' कविता उद्घोषिका मीना बज्राचार्यं ब्वनाः न्यंकादिल।
अथेहे रमा कर्णजीत ताम्राकारं 'गुरु जगतलालया लुमन्तिइ' च्वखँ, नःलि बज्राचार्यं 'मचा कविता' कविता, प्रतिसरा साय्मिं 'लोडसेडिङ' कविता, सुनिता जुनु राजभण्डारीं 'छंगु लुमन्ति' बाखं, भावना पुं 'हक्केगु भाषा' कविता, सिल्भिया राजोपाध्याय 'वर्षा छझाः' कविता, मोतिलक्ष्मी शाक्यं 'लोडसेडिङ' बाखं, रीना बनिया तुलाधरं 'धेबा हे जक मलहम खःला?' बाखं, निजिरोश श्रेष्ठ न्याछ्यों 'जिगु मन याउँसे च्वन' बाखं, सुजिता माःजुं 'मतिना' बाखं अले उद्घोसिकापिं मीना बज्राचार्यं 'बाल विवाह' बाखं पूर्णिमा शाक्य डंगोलं 'मिसा, साहित्य व सम्मेलन' कविता वाचन यानादीगु खः।
मिसा साहित्यकारपिंस साहित्य वाचन याय्गु ज्या क्वचाःबले ५:२५ बजे जुल। नेपाल भाषा मंकाः खलः यल या थीथी ख्यलय् विशेष योगदान ब्यूपिं ब्यक्तित्वपिन्त हनेगु उद्देश्य कथं थुगुसिइ थ्व ज्याझ्वलय हनेत ब्वनातःपि मय्जुपिं मन्दीरा प्रधान व मय्जु स्नेहलता वनपिन्त मूपाहा सुलोचना मानन्धरजुं दोसल्लां न्येयेका अलय् विशेष पाहा सुस्मिता मास्केजुं वहया फ्रेमं भुनातःगु प्रशंसा पत्र लःल्हाना सम्मान याना दिल।
सम्मेलनय् ब्वति काःपिं सकलें साहित्यकारपिंत मंकाः खलःया सल्लाहकार डा. पुष्पराज राजकर्णिकारं मतिनाया चिं लःल्हानादीगु खः।
रचना पाठ लिपा सहप्राध्यापक प्रेमहिरा तुलाधरं अन ब्वंगु फुक्कं रचनाया समीक्षा यानादिल। वय्कलं अन १६ पु कविता, १४ पु बाखं, व निपु च्वखँया समीक्षा यासें छपु बाखं व छपु कविता लिपा जक दुतिंगु जानकारी बियादिल।
समीक्षा लिपा निक्वः तक सगरमाथाया सफल आरोहण यानादीम्ह मयजु सुस्मिता मास्कें थःगु नुगः खँ तसें 'थौ थःगु जाति व समुदायं थःत हंगु थ्व इलय् थःत तसंक हे लय्ताःवःगु' खँ धयादिल।
सनिलया ६.०५ बजे मूपाहां मय्जु सुलोचना मानन्धरं "या देवी सर्व भूतेषु...... " धइगु संस्कृत श्लोक ब्वनाः 'थ्व बन्दना दबुली विराजमान जुयादीपिं सकलें मिसा व्यक्तित्वपिंत खः' धयादिल। ज्याझ्वःयात हे कयाः वय्कलं थःगु छपु कविता नं न्यंकादिल -
खिउँगु चा
छम्ह मचा प्वाथय् दुम्ह मां खः
पत्याः मजूसा पिया च्वँ
कन्हय् सुथय् वं सुर्द्यः बुइकी
ज्याझ्वःया दथुइ चिकिचाधिकःम्ह मय्जु स्लेशा श्रेष्ठं 'ख्यालि' कनाः अले अनिता महर्ज व रीता महर्जनं म्येँ न्यंकाः मनोरञ्जन बियादीगु खः।
(प्रशिक्षाथी पत्रकार)

More Stories Like this