न्हूदँया न्हूगु हे नारा

येँ(सन्ध्या टाइम्स)/नेवाः देय् दबूपाखें थुगुसी नेपाल संवत् ११३२ न्हूदँ हनेगु नितिं न्हूगु हे नारा तयार याःगु दु ।

'न्हूदँ ११३२ या भिंतुना, शान्ति व संविधान झीगु मंतुना' धइगु न्हूगु नारा बियाः थुगुसीया न्हूदँ हनेगु निर्णय नेवाः देय् दबुलिं याःगु खः। थुगुसी न्हूदँया निंतिं तयार याःगु उगु नारा देय्न्यंकं थ्वयेकाः थुगुसीया न्हूदँ तःजिक हनेत देय्न्यंकं हे देय् दबू नाप आबद्ध जूगु नेवाः खलः पुचःतय्त सर्कुलर यायेधुंकूगु खँ देय् दबूया नायः नरेश ताम्राकारं 'सन्ध्या टाइम्स'यात कनादिल ।

थुगुसी देय्न्यंकं हे न्हूदँ तःजिक हनेगु नितिं नापं देय्न्यंकं हे न्हूदँया लसताय् जुइगु ज्याझ्वःयात गुकथं समन्वय यानाः वनेगु धइगु विषयसं सहलह ब्याकेगु ज्या जुयाच्वंगु जानकारी नं वय्कलं बियादीगु दु। थ्व हे दथुइ न्हूदँ हनेगु नितिं नेवाःतय्गु खलः पुचःतय् दथुइ आवंनिसें हे बैठक च्वनेगुनिसें थीथी कथं ज्याझ्वः यायेगु निंतिं सक्रिय जूगु दु ।