गृह मन्त्रालय बीत प्रमयात दवाव
सपथ काये न्ह्यः विद्याया बबाल
यें (सन्ध्या टाइम्स) / न्हूम्ह प्रधानमन्त्री माधव नेपालं म्हिगः सपथ ग्रहण याःवंगु इलय् पद विभाजनयात कयाः तःधंगु हे 'लफडा' जुल । खास यानाः पार्टीया उपाध्यक्ष विद्या भण्डारीं थःत गृह मन्त्रालय हे माः धकाः बिउगु दवावं प्रधानमन्त्री माधव नेपालया सातो हे कया बिउगु दावी सूत्रतय्सं याःगु दु ।
सपथ ग्रहणय् वनेगु ई त्ययेकाः तक नं विद्या भण्डारीं थःत गृह मन्त्रालय हे माः धासें मखुसा सपथ ग्रहण हे याये मखु धकाः ख्याच्वः बियाहःगु खः ।
विद्यापाखें तःधंगु हे दवाव वःगुलिं प्रम नेपालं पार्टी अध्यक्ष झलनाथ खनालयात फोन यानाः छु यायेगु धकाः सुझाव कयादिल । खनालं विद्या भण्डारी विरामी नं जुयाच्वंगुलिं वय्कलं गृह चले याये फइ मखु उकिं बरु छुं नं ज्या यायेम्वाःगु रक्षा बिउसां जिउ धयाहल ।
वयां लिपा हानं केपी ओलीं फोन यानाः विद्यायात गृह हे बीमाल धकाः माधवयात दवाव बिया हल । माधवयात दवाव बीगु झ्वलय् विद्या भण्डारीं 'छितः जिपिं हे जानाः प्रधानमन्त्री दयेकागु खः जिपिं हे राष्ट्रपतियाथाय् वनागु खः तर आः चाहिं छिं हे जितः गृह बी मखु धयादियागु ला' धइगु शव्द तकं प्रयोग याःगु दावी सूत्रं बिउगु दु ।
आखिर खँ मिले हे मजुइवं विद्या व सुरेन्द्र पाण्डे निम्हेसितं मन्त्रालय हे खुले मयासे बिना विभागीय मन्त्रीया रुपय् सपथ ग्रहण याकूगु खः । सपथ ग्रहण सिधयेकाः प्रम नेपालं विद्यायात 'आःयात छि रक्षाय् वनाः निं पद बहाली यानादिसँ लिपा माःगु याये' धकाः उखे छ्वया बिउगु खः । उबलय् तक नं विद्यां थः पदवहालीया लागिं गृह मन्त्रालय वनेगु धकाः अडान कयाच्वंगु खँ धाःगु दु ।
विद्यायात रक्षा मन्त्री दयेकूगु खँय् ओली पक्ष असन्तुष्ट जुयाच्वंगु खँ सूत्रं धाःगु दु । लिसें खनाल पक्षं हःम्ह मेम्ह मन्त्री सुरेन्द्र पाण्डेयात विषय हे मखुसां अर्थय् छ्वत धकाः नं ओली पुचः तम्वयाच्वंगु खँ धाःगु दु ।
रक्षा मन्त्रीया पदभार ग्रहण यायेत रक्षा मन्त्रालय झाःम्ह विद्या भण्डारीयात अन प्रधानसेनापति रुक्मांगद कटवालं मर्यादा हे मतसे 'सम्मान' याःवःगु खँ मेगु सूत्रं धाःगु दु । रक्षा मन्त्रालय दुने फ्यतुइगु थासय् नं कटवालं मन्त्री भण्डारीयात थःगु विभागीय मन्त्री स्वयां नं पासा थें व्यहार याःगु खँ अन उपस्थित जूपिं मनूतय्सं धाःगु दु ।
