नेवाः जागरण मञ्चया भिंतुना कालबिल
येँ(सन्ध्या टाइम्स)/नेवाः जागरण मञ्चं मोहनि नखःया लसताय् छगू भिंतुना तुच्चा ज्याझ्वःया ग्वसाः ग्वल। ज्याझ्वःया दथुइ महानगरीय प्रहरी प्रभाग हनुमानध्वाखाया न्हूम्ह प्रहरी उपरीक्षक राजेन्द्र श्रेष्ठयात नं लसकुस यायेगु ज्या जूगु खः।
मञ्चया संयोजक सुजीव वज्राचार्यया सभापतित्वय् जूगु ज्याझ्वलय् न्हूगु प्रहरी उपरीक्षक श्रेष्ठयात नेवाः स्वायत्त राज्य मंकाः संघर्ष समितिया नायः नरेश ताम्राकार, सचिवालय कजि मल्ल के. सुन्दर, सल्लाहकारपिं सभासद तीर्थराम डंगोल, कृष्णगोपाल श्रेष्ठ, लक्ष्मण राजवंशी, डा. महेशमान श्रेष्ठ लिसें लक्ष्मीदास मानन्धरपिंसं खादां क्वखायेकाः भिंतुना देछानादीगु खः।
ज्याझ्वलय् येँया सुरक्षा व्यवस्था कायम याना तयेत थनया जनतापाखें न्ह्याबलें ग्वाहालि दइगु आशा प्रहरी उपरीक्षक श्रेष्ठं यानादीगु खः। सभापतिया थासं मञ्चया संयोजक वज्राचार्यं नेवाःभूमिइ नेवाःत हे प्रमुख थासय् वयेमाः धइगु माग नेवाःतय्सं यानाच्वंगु इलय् येँया सुरक्षा प्रमुखय् नेवाः हे वःगु लसताया खँ जूगु कनादिल।
