न्हूम्ह संघनायक व संघउपनायक पदस्थापन

येँ(सन्ध्या टाइम्स)/नेपाःया खुम्हम्ह संघनायक पदय् भिक्षु अश्वघोष महास्थविरयात व संघउपनायक पदय् आचार्य भिक्षु कुमार काश्यप महास्थविरयात विनयकर्मपूर्वक नेपाली भिक्षु महासंघया दुजःतय्सं पदस्थापन यात। ८५ दँ दुपिं वसपोल संघनायक व संघउपनायकपिंत विशेष अभिनन्दन समारोह यासें वृहत सार्वजनिक सभा यायेगु क्वःछिउगु दुसा उबलय् सम्बन्धित बौद्ध संघसंस्थापाखे नं अभिनन्दन याइगु ज्याझ्वः दु। उकुन्हु आश्विन ७ गते दिवंगत नेपाःया न्याम्हम्ह संघनायक भिक्षु बुद्धघोष महास्थविर दिवंगत जुइधुंकाः प्वनाच्वंगु उगु धर्मगौरवं जाःगु सम्मानित पदय् पदस्थापन यायेगु विनयपूर्वक कर्मविधि म्हिगः विश्वशान्ति विहारया भिक्षुपिनि संघकर्म ज्या यायेगु थाय् सीमागृहस सम्पन्न जूगु खँ भिक्षु कोण्डन्यं 'सन्ध्या टाइम्स' यात कनाबिज्यात। लिसें मदुम्ह संघनायक भिक्षु बुद्धघोष महास्थविरया बुद्धशासनिक योगदानयात कःघासें कन्हय् सोमबाः अखिल नेपाल भिक्षु महासंघ व सुमङ्गल बौद्ध संघ परिवारया ग्वसालय् गुणानुस्मरण सभा याइगु जूगु दु।