लडाकुया भत्ता अप्वयेकल

लगानी बोर्डया निर्देशक ल्ययेत समिति
येँ(सन्ध्या टाइम्स)/थौं सुथय् च्वंगु मन्त्रिपरिषद्या बैठकं शिविरय् च्वनाच्वंपिं माओवादी लडाकुतय्गु भत्ता लय् १५०० तका अप्वयेकेगु निर्णय याःगु दु।
लडाकुतय्सं न्हापां लच्छिया स्वद्वः तका भत्ता कया वयाच्वंगु खः। प्रधानमन्त्री डा. बाबुराम भट्टराई न्हापा अर्थमन्त्री जुयादीगु इलय् उगु भत्ता स्वद्वः तकां अप्वयेकाः न्याद्वः तका थ्यंकूगु खः। थ्व खाना खर्च बाहेकया भत्ता खः।
माओवादी सेनाया लडाकुतय्सं म्होतिं न्याद्वः तका भत्ता कया वयाच्वंगु खः। व बाहेक सुगम क्षेत्रय् दुगु क्यान्टोमेन्टय् दुपिं लडाकुतय्सं न्हिं ७० तका व दुर्गम लागाया क्यान्टोमेन्टय दुपिंसं न्हिं ११२ तका भरणपोषण कया वयाच्वंगु खः। आः लडाकुतय्सं लच्छिया ६ द्वः ५०० तका काये खनीगु जूगु दु। माओवादीया १९,५७५ म्ह लडाकुत देय्न्यंकं यानाः ७ गू मुख्य शिविर व २१ गू सहायक शिविरय् च्वना वयाच्वंगु दु।
थौंया मन्त्रिपरिषद् बैठकं लगानी बोर्डया कार्यकारी निर्देशक प्रतिस्पर्धापाखें ल्ययेत अर्थमन्त्री बर्षमान पुनया संयोजकत्वय् स्वम्हेसिया छगू समिति नं स्वंगु दु।
सिंहदरवारया प्रधानमन्त्री नापं मन्त्रिपरिषद्या ज्याकुथी च्वंगु उगु बैठकं मोहनि, स्वन्ति नापं छठ पर्व थेंज्याःगु नखःया इलय् वयेफुगु सुरक्षा चुनौतिया सामना यायेत फुक्क सुरक्षा निकाययात प्रभावकारी ढंगं परिचालन यायेत गृहमन्त्री विजयकुमार गच्छेदारयात निर्देशन नं बिउगु दु।
ढुंगेलया मुद्दा लित कायेत प्रक्रिया
द्वन्द्वकालय् नागरिक हत्या याःगु द्वपनय् सर्वोच्च अदालतं सर्वस्व हरण नापं जन्मकैदया सजायँ न्यंकूम्ह एकीकृत माओवादीया सभासद् बालकृष्ण ढुंगेलया मद्दा लित कायेगु निंतिं सरकारं माःगु प्रक्रिया न्ह्याकीगु जूगु दु।
थौं सुथय् च्वंगु मन्त्रिपरिषद्या बैठकं ढुंगेलया मुद्दा लित कायेगु निंतिं राष्ट्रपतियाथाय् सिफारिस यायेगु निर्णय याःगु दु। युवा तथा खेलकुदमन्त्री कमला रोकां थौं हे राष्ट्रपति डा. रामवरण यादवयाथाय् ढुंगेलया मुद्दा लित कायेगु नितिं शीतलनिवासय् सिफारिस पौ छ्वयेगु निर्णय याःगु खँ नं सीदुगु दु। सर्वोच्च अदालतं याःगु कैदया सजाय संविधानया संरक्षकया हैसियतं सरकारया सिफारिसय् राष्ट्रपतिपाखें लित काये फइगु कानुनी प्रावधान दु।