चिबाखं सम्मेलनया अनुभव

मतिइ मखंथें वंगु शुक्रबाः कुन्हु कुपन्दोलय् नःलि नेपालभाषा पत्रिका व प्रतिभा समाजया ग्वसालय् जूगु चिबाखं सम्मेलनय् ब्वतिकायेगु ह्वःताः चूलात। न्हूकथंया सम्मेलनय् लय्लय् तातां वना। जितः बांलाक लुमंगु खःसा थनिं नीदँ न्ह्यः जिं नं छपु चिबाखं च्वयागु सुकुन्दा दँपौया निंतिं। जितः फसं पुइका यंकल, जि गन, चिबाखं गन।
ई स्वयाः बाघौं, घौछि लिबाक्क ज्याझ्वः न्ह्याकेगु ला झीगु अधिकार हे खत। न्ह्यात। छसीकथं साहित्यकार भाजुमय्जुपिन्सं थःथःगु रचना ब्वनाः न्यंकादिल। वातावरण छकलं हे साहित्यमयी जुल।

ब्वनायंकूलिसे सिइदत अन ला ब्याहाया भ्वय् लाकि सराद भ्वय् धकाः हे मसिइकं ज्वाँय् ज्वाँय् तिसा वसः पुनावःपिं थें। थः थःगु वसजाः ब्वल तर छुकियात चिबाखं धायेगु अले थःके दूगु चिबाखं खःलाकि मखु धैगु हे अलमलपिं नं दं झाःगु जुयाच्वन। व नं छगु फ्वसा ज्ञान जुल जिथें ज्याःपिं साहित्य ब्वमिपिनिगु लागि।

न्यापु बाखं धुंकाः भचा ई परिसम्बादया निंतिं छ्यानातःगु जुयाच्वन। थः थःम्हस्यां थःथःके दूगु खँ तयादिल। चिबाखं छुकियात धायेगु धैगु न्ह्यसः नं वल, आः चिबाखं गय् यानाः च्वयेगु ध्रैगु तालिम बिइमाःगु खँ नं वल। थ्व ला अजूचायापूगु विधा जक मखु थुकिं नेवाःतय्गु थःगु पहिचान बिइफइगु सम्भाव्यता तकं खन। चिबाखनय् अथे दइ, थथ दइ, अले थुकिइ व दयेमाः थ्व दयेमाःया चर्चा जुल। छिं मसिउ खनीका धकाः गुलिस्यां थःगु विद्वताया प्रदर्शनी नं यात, गुलिस्यां धाःसा जिं च्वयागु थ्व हे खः, चिबाखं जुल लाकि मजू धकाः आत्मसमर्पण नं यात।
ग्ाुलिस्यां मसिकं तःहाकःगु बाखं ब्वनादिल, गुलिस्यां थ्व हे जुइ चिबाखं धकाः च्वनादिल। गुलिसितं सितं थःगु नां वःसां ब्वने म्वाःसा जिउ धयाथें ताल। अथेसं म्हिचां बाखं लिकानाः ब्वना न्यंकादिल। अझ छम्ह भाजुं ला बाखं ज्वना वये मफत धकाः त्वह तसें मनय् टाइप यानाः सेभ यानातःगु छपु बाखं न्यंकादिल, वनं बेजोडजु हे।

समीक्षक अने हे न्यंगु बाखंया समीक्षा अन हे यानादिल। भचा भचा थुकियात चिबाखं धाइ धकाः नं कनाः थःगु धर्मया मान तयादिल।

जिं सुइत छु धायेगु? जि समीक्षक, समालोचक मखुसां पाठक या नं यः मयः ला दइ नि। दये नं माल। जितः ईश्वरी मैया, तुयु पुंया बाखनं थिल। सुनिल बज्राचार्यया बाखनय् प्रसंग तनाबिउगु जूसा व सुनिता जुनुजुया बाखनलय् जानकारीया निध्व लिकानाबिउगु खःसा अझ बांलाइगु खःला थें ताल। मेगु नं बाखंत बाखंया रुपय् यल।
ब्ााखं कनीपिन्त स्वयाः विचार तइपिन्त यक्व ई बिउगु भचा पाय्छि मताल, शायद जि चिबाखं जक न्यने धकाः वयाम्ह जूगुलिं ला। धायेत ला यक्व सिया यक्व खँ धायेगु दु तर उकियात न्यनाः मनन याइपिं सु दु थन? अले हानं बाखं च्वइपिन्सं हे समालोचकया भासं चिबाखं अथे जुइमाः थथे जुइमाः धयाजुलकि लिपा थःगु बाखनय् व गुण मन्तकि न्यनीपिन्त न्यालुसे च्वनीगु संभावना नं ल्यनाच्वनी।

न्ह्यागुसां इलय् व्यलय् थथे साहित्यीक ज्याझ्वः जुयाच्वनकि च्वमिभाजुमय्जुपिनिगु च्वसा खतं मनइगु अले न्यनेदयेवं गाःपि जिपिंथेंज्याःपिनि न्हाय्पनय् नं सिचुसे च्वनाच्वनीगुयात मखु धाये छिनीमखु जुइ।

News Location:

More Stories Like this

मेरिल्याण्डय् लाखय् व पुलुकिसिलिसे हन येँयाः
स्यस्यः समाजं सत्यमोहन जोशीयात हन
मूलयात ग्वाहालि लःल्हात
मेहेन्दी च्वयेगु कासा जुइगु
मचातयत मां भाय् स्यनेगु संस्था नीस्वन