ब्वः

ध्रुव मधिकःमि
वयात अन च्वंपिन्सं द्यः धकाः पूजा याना हनाबना तयाः थाय्बाय् बियाः तयातःगु दु । वयात सकसिनं थःथःगु तजिलजि कथं हनातःगु नं दु । छन्हु सुथय् वया न्ह्यलंचाय्वं मतिइ वन - गुलि द्यः जक जुयाच्वनेगु । व स्वयाः नं थंम्ह द्यः जुइदुसा गय् च्वनी ।

छथाय् चाह्यू वंबले खन - छपुचः मनूत वया किपा न्ह्यःने तया ध्यानमग्न जुयाच्वंगु । व पुचलय् वं गबलेंमखंपिं, म्हमस्यूपिं जक । उमिगु ल्हातय् तुपः, कथि, भाला अनेतनेया ल्वाभः दु ।
द्यः अजू चाल - छिपिं सु ?
लिसः वल - जिपिं थनयापिं हे खः ।
थन छु यानाच्वनागु लय् । द्यवं न्यन ।
थाय्बाय् मदयाः थन हे च्वनाजूसां छःपिन्त हनाच्वना ।

उमिगु लिसः न्यनाः द्यः लय्ताल । वया लुमन गुगु इलय् महाद्यवं नं छम्ह ब्याधायात चच्छि जाग्राम च्वना पुज्यागु बापतय् तःधंगु बरदान ब्यूगु खः । उबले सकलें देवदेवी सर्गतं स्वां वागाय्काः लसकुस याःगु खः । वया न महाद्यः जुइगु इच्छा जुल । वं उमित थःगु द्यःछेँय् ब्वनाहल । थःगु महानतायात बय्बय् याकेकथं व लसतां हनेत स्वां वा गाय्केत सकसितं इनाप यात । तर अन च्वंपिं मनूत द्यःया उजं न्यना लय्मताः । उमिके छगू बचं हे मन्यंसे गन गनयापिं सुसु म्हमस्यूपिंत द्यःछेँय् दुतहल धकाः झं जक तंम्वय्कल । द्यःयात थें उमित नं पुज्याय्माःगु उजं न्यना अन च्वंपिं हीमी चाल । उबले लाक हे छम्हेसिनं द्यःयात ब्वःबिल । गबलें हे ब्वःबिया मतःम्ह द्यःयात ब्वः ब्यूगु सकसिनं ताल । अले ला छम्हेसिनं जक मखु सकसिनं ब्वःबियाकल । फुकंसिगु ब्वःफयाच्वने मछुया अनंलि व द्यःछेँ त्वतावन । आः व द्यः मखय्धुंकल ।

More Stories Like this