'विवादपाखे मवँसे नेवाः प्रदेशय् जक ध्यान बीमाः'
येँ (सन्ध्या टाइम्स)/नेवाः देय् गुथि नेपालमण्डलया न्यागू तःकेहेँ गुथि मध्ये न्हापांगु नेवाः बुद्धिजीवी गुथिया च्याक्वःगु बुदिं वंगु बुधवाः थनया नेपाल आदर्श मा.वि.इ छगू ज्याझ्वःया दथुइ न्यायेकल ।
एमाले नेतालिसें नेवाः देय् गुथिया संरक्षक राजेन्द्र श्रेष्ठ मूपाहां कथं झाःगु उगु ज्याझ्वलय् वय्कलं संघर्ष समितिं नेवाः राज्य घोषणा यायेधुंकूगु व संविधानसभां तक नं नेवाः राज्य स्वीकार यायेधुंकूगु इलय् राजधानी प्रदेश, खुगू प्रदेश थेंज्याःगु विवादत हयाः तक्यंकेगु विचारधारा छखे छ्वयाः सकसिनं नेवाः स्वायत्त राज्य छगुली हे जक ध्यान केन्द्रित जुइमाः धयादिल ।
ज्याझ्वलय् गुथिया पुलांम्ह छ्याञ्जे बिष्णु चित्रकार, नेवाः देय् गुथिया नायः मोहनबहादुर महर्जन, दांभरि सरस्वती श्रेष्ठपिंसं नं भिंतुना बियादीगु खः। न्वकु विरेन्द्ररत्न शाक्यं लसुकस यानादीगु उगु ज्याझ्वः भाजु शंकरप्रसाद प्रधानया सभापतित्वय् न्ह्याःगु खः ।
