मोहनि सिधयेवं हे देउवाया आन्दोलन
येँ(सन्ध्या टाइम्स)/नेपाली कांग्रेसया बरिष्ठ नेता शेरबहादुर देउवा पक्षं मोहनि नखःलिपाः देय्न्यंकं आनदोलन याइगु जूगु दु।
कांग्रेसया भातृ संगठन विघटन याःगु विरोधय् आमरण अनसन च्वंपिं कार्यकर्ता व देउवा पक्षया नेतातय्गु दथुइ थौं सुथय् देउवाया निवास बुढानिलकण्ठय् जूगु बैठकं अथे मोहनि नखःलिपा आन्दोलन यायेगु धकाः निर्णय याःगु खः। आन्दोलनया स्वरुपया बारे धाःसा छुं दिं लिपा हे हाकनं सहलह ब्याकाः तयार यायेगु धकाः सहमति जूगु दु। कांग्रेसया सभापति सुशील कोइरालां भातृ संगठन विघटन यानादीवं देउवा पक्ष संस्थापन पक्ष विरुद्ध आक्रमक रुपं क्वहांवःगु खःसा बरिष्ठ नेता देउवां पार्टीया मनोनित केन्द्रीय सदस्य पदं तकं राजीनामा बियादीगु खः। उगु संस्थापन पक्षं धाःसा देउवाया राजीनामा स्वीकृत मयायेगु नापं देउवायात केन्द्रीय समितिया बैठकय् सःतेगु धकाः निर्णय याःगु दु।
