न्हिं छगू लाख मनुखं स्वनिगः त्वःताच्वन

येँ(सन्ध्या टाइम्स)/देशय् छुं भचा शान्ति वःगुया लिच्वः कथं थुगुसी जनयुद्ध लिपाया दकलय् भिडभाडमुक्त मोहनि जुइत्यंगु दु। थुगुसी मोहनि न्यायेकेत स्वनिगः त्वःताः गामय् वनाच्वंपिं मनूतय्गु प्रवाह स्वयेबलय् थज्याःगु संकेत दया वःगु खः।
यातायात व्यवसायीतय्सं धाः कथं थौंकन्हय् स्वनिगः त्वःताः छेँय् वनाच्वंपिं मनूतय् ल्याः न्हिं छगू लाख धइथें थ्यनाच्वंगु दु। नःलास्वां पीगु न्हिनिसें न्हिं ७५ द्वः मनूतय्सं स्वनिगः त्वःताच्वंगु खःसा म्हिगःनिसें थ्व ल्याः अप्वयाः न्हिं छगू लाख थ्यंगु दु। आः वइगु नवमि तक थ्वहे ल्याखं मनूत पिहां वनीगु अनुमान नं यातायात व्यवसायीतय्सं याःगु दु।
सामान्यतयाः न्हिं द्वःछिगः बस चले जुइगु स्वनिगलय् म्हिगःनिसें २५०० गः बसं यात्रु ल्ह्ययेगु ज्या यानाच्वंगु दु।
व्यवसायीतय् अनुभव कथं देशय् जनयुद्ध सुरु जुइधुंकाः मोहनि न्यायेकेत स्वनिगलं मनूत थुलिमछि ल्याखय् पिहां वंगु थ्वहे न्हापांखुसी खः।
उलि जक मखु थुपालय् भारत व खाडी लागाय् ज्या याः वनाच्वंपिं नेपाःमित तकं मोहनि समेत न्यायेकेगु ताः तयाः छेँय् लिहां वयाच्वंगु दु।
थ्व प्रवाह स्वयेबलय् मोफसलया मोहनि भिडभाडपूर्ण जूसां स्वनिगःया मोहनि धाःसा शान्तपूर्ण खने दयेफुगु अनुमान याःगु दु।