थौं व कन्हय् मसाल जुलुस
मोहनिबलय् नं वैद्य पक्षया आन्दोलन
येँ (सन्ध्या टाइम्स)/एकीकृत माओवादीया प्रचण्ड व उपाध्यक्ष मोहन बैद्य किरण निगुलिं पक्षं पार्टीया संस्थापन पक्ष थःपिं हे खः धकाः दावी यानाहःगु दु। विशेष यानाः थःथःगु पक्षया कार्यकर्तातय्त प्रशिक्षण बीगु झ्वलय् वय्कःपिंसं अज्याःगु दावी यानाहःगु खः ।
थ्वहे दथुइ केन्द्रीय कमिटीया बैठक मजूतले आन्तरिक विवादयात कयाः सतकय् मवनेगु धकाः सहमति याःसां नं उपाध्यक्ष मोहन बैद्य किरण पक्षधर थनिंनिसें सतक आन्दोलनय् कुहां वइगु जूगु दु। थौं केन्द्रीय कमिटीया बैठक च्वनेगु धयातःगु खःसां हानं मेगु त्वहः तयाः अनिश्चितकाल तकया निंतिं थ्व बैठक स्थगित याःगु दु। उकिं नं वैद्य पक्षं थनिनिसें हे सतकय् कुहां वयेगु निर्णय याःगु खः ।
रक्षामन्त्री शरदसिंह भण्डारीं देय् कुचा थलेगु अभिब्यक्ति बिउगु व सरकार दयेकेगु इलय् मधेसवादी मोर्चालिसे याःगु प्यंगू बुँदाया सम्झौता राष्ट्रघाती जूगु विरोधय् एकीकृत माओवादीया मोहन बैद्य पक्षधर झिंन्यागू जनवर्गीय व जातीय संगठनं थौं बहनी देय्न्यंकं मसाल जुलुस पिकाइगु जूगु दु। येँया शान्तिबाटिका, यलया लगंख्यः व ख्वपया सूर्य विनायक लागां बहनी ६ बजे मसाल जुलुस पिकायेगु तयारी याःगु खः ।
माओवादीया जनवर्गीय संगठन अनेरास्ववियु, किसान महासंघ, महिला क्रान्तिकारी, क्रान्तिकारी पत्रकार संघ, आदिवासी जातीय क्षेत्रीय महासंघ नापं थीथी झिंन्यागू संगठनया नामं मसाल जुलुस पिकायेगु तयारी याःगु खः।
मसाल जुलुसया निंतिं माओवादीया किरण पक्षधर नेता व कार्यकर्तातय्त सर्कुलर यायेधुंकूगु दु धकाः छम्ह नेतां जानकारी बियादीगु दु। मसाल जुलुस थौं जक मखु कन्हय् नं जुइ धकाः किरण पक्षधर नेतृ जयपुरी घर्तीं संचारकर्मीतय्त जानकारी बियादीगु दु ।
माओवादीया केन्द्रीय कमिटीया बैठक असोज १ गते च्वनेगु धाःसां अबलय् प्रधानमन्त्री नापं पार्टीया उपाध्यक्ष डा. बाबुराम भट्टराई न्यूयोर्कय् वनेमाःगुलिं बैठक स्थिति याःगु खःसा आः धाःसा मोहनि नखः जुयाः स्थगित याःगु खः। 'मोहनि'या कारणं माओवादी केन्द्रीय कमिटी बैठक तकं अनिश्चित जूगु दु ।
वैद्य पक्षया नेता बादल
एकीकृत माओवादीया लाइन संघर्षया झ्वलय् उपाध्यक्ष मोहन बैद्य किरण पक्षधरं आः क्रान्ति पूरा यायेगु नितिं न्हूम्ह नेताया रुपय् महासचिव रामबहादुर थापा बादलयात ल्यःगु दु। ताः ई तक नं तटस्थ च्वनादीम्ह प्रभावशाली नेता बादलयात नेता कथं न्ह्यःने हःगुलिं आः किरण पक्षधरया नेता व कार्यकर्तातय्सं क्रान्ति पूरा जुइ धकाः आशा याःगु खँ माओवादीया छम्ह नेतां कनादीगु दु। किरण आः छगू लाईनया बैचारिक नेता जक जुइगु अले सांगठनिक नेता धाःसा बादल जुइ धाःगु दु ।
