त्रिचन्द्र कलेजया नेवाः शिक्षक कर्मचारी मुना
येँ(सन्ध्या टाइम्स)/सकलें नेवाःत छधी जुया वनेगु ताः तयाः त्रिचन्द्र कलेजया सकलें प्राध्यापक व कर्मचारी जानाः नीस्वंगु
'त्रिचन्द्र क्याम्पस नेवाः स्यनामि व ज्याकःमि पुचः' पाखें मोहनि व न्हूदँया लसताय् लाकाः क्याम्पसय् छगू भिंतुना कालबिल ज्याझ्वः यात। ज्याझ्वलय् क्याम्पसया सकलें नेवाः स्यनामि व ज्याकःमितय्सं ब्वति काःगु खः।
ज्याझ्वलय् न्ववासें पुचःया नायः डा. गोपाल धौबन्जाजुं नेवाःतय्सं थःगु मातृभूमि नेपालमण्डलयात स्वायत्त दयेकेगु लागिं सकलें नेवाः छधी जुयाः न्ह्याः वनेमाःगु बिचाः प्वंकादिल।
मूपाहां क्याम्पस प्रमुख प्रा.डा. हरिप्रसाद पराजुलीं सकलें नेपाःमितय्सं राष्ट्रियताया भावना तयाः ज्या यायेमाःगु खँ कनादिल।
