हाकूगु न्हि बृहत ज्याझ्व लिसें हनीगु

१६ गते नेवातय् विशाल र्‍याली

सर्वाच्च अदालतं भाषिक मुद्दाय् याःगु अन्ययपूर्ण निर्णयया विरुद्ध हाकूगु न्हि हनेत व न्हूगु संविधानय् नेवाः स्वयत्त राज्यया माग यासें थ्वहे वइगु जेठ १८ गते नेवाः स्वायत्त राज्य मंकाः संघर्ष समितिया ग्वसालय् जुइत्यंगु नेपालमण्डल बन्द ताःलाकेत जेठ १६ गते कुन्हु येँया बसन्तपुलिं छगू विशाल नेवाः ऐक्यवद्धता र्‍याली पिकायेत्यंगु दु । थुकीयात जेठ १८या नेपालमण्डल ताःलकेत नेवाःतय् ऐक्यबद्धता र्‍याली कथं नं कयातःगु दु । फुक्कं नेवाः संघसंस्थाया नेता कार्यकर्ता क्वकयाः वकुन्हु नेवाःतय् शक्ति प्रदर्शन याये कथं र्‍याली पिकायेगु खँ ग्वसाः खलकं धाःगु दु ।

अथे हे बन्द ताःलाकेत आह्वान यासें थिमि, भ्वँत, ख्वप, किपू व यलय् नं प्रचार सभा याइगु ग्वसाः दु । बन्दया आह्वान यासें जेठ ९ निसें १४ गते तक किपू, नगां, पांगा, चोभार, बाहिरगां आदि लागाय् कोणसभा याइगु ग्वसाः दु । उकथं १५ गते बाघभैरवय् नेवाः सभा, १६ गते मिसापिनि जक जुलुस, १७ गते मशाल जुलुस व १८ गते सुथंनिसें बन्दया आह्वान यानाः थाय्थासं जुलुस पिकायेगु ज्याझ्वः दयेकातःगु दु ।

अथेहे वंगु शनिवाः नेवाः स्वायत्त राज्य मंकाः संघर्ष समितिं जेठ १८ गते नेवाः स्वायत्त राज्य माग यासें यायेत्यंगु नेपालमण्डल बन्द ज्याझ्वः ताःलाकेगु निंतिं असनय् प्रचार सभा यात । सभाय् नेवाः देय् दबूया नायः नरेश ताम्राकार, नेपाः राष्ट्रिय पार्टीया न्वकु नापं नेवाः ल्याय्म्ह न्ह्यलुवाया संयोजक नरेशवीर शाक्य, नेपाः लोकतान्त्रिक नेवाः संघया नायः सानुराजा शाक्य, नेवाः जागरण माचया संयोजक सुजीव बज्राचार्य व नेवाः राष्ट्रिय मुक्ति मोर्चाया येँया इन्चार्ज उमेश स्थापित पिंसं जेठ १८ गते बन्द ताःलाकेगु निंतिं फुक्क नेवाःतय्त सतकय् कुहां वयेत आह्वान यानादिल ।

थ्वहे दथुइ वंगु आइतवाः चुनिखेल चाबही व चोभारय् नं कोणसभा जुल । नापं नेपालमण्डल बन्द ताःलाकेत थाय्थासय् कोणसभा, वालिङ व जुलुस ज्याझ्वः जुयाच्वंगु दु ।

More Stories Like this