कोइराला-देउवा पक्षया थःथःगु रणनीति

येँ(सन्ध्या टाइम्स)/भातृ संगठन विघटनया विवाद तच्वयाः बरिष्ठ नेता शेरबहादुर देउवां केन्द्रीय कमिटीं राजीनामा बीधुंकाः आः गथे यानाः वनेगु धइगु विषययात कयाः संस्थापन पक्ष व देउवा पक्षं थःथःगु कथं तयारी याःगु दु।
देउवाया राजीनामा तत्काल स्वीकृत मयासे आन्तरिक तयारी याना वनेगु धकाः संस्थापन पक्षं रणनीति दयेकूगु दुसा देउवा पक्षं नं माल धाःसा सभापति सुशील कोइराला विरुद्ध अविश्वासया प्रस्ताव तकं यंकेगु तयारी याःगु दु। थौं हे निगुलिं पक्षं थःथःगु तयारीया झ्वलय् ब्यागलं ब्यागलं कथं मुँज्या च्वंगु दु। कांग्रेसया विशेष महाधिवेशन सःतकेगु नितिं महाधिवेशन प्रतिनिधितय्गु ल्हाःचिं मुंकाः सभापतियात लःल्हायेगु अले उगु हे सभापति विरुद्ध अविश्वासया प्रस्ताव तयेगु रणनीति देउवा पक्षं तयारी याःगु सूत्रं धाःगु दु।
उखे देउवाया राजीनामा स्वीकृत यात धाःसा अझ अप्वः ज्या मछिनीगु अवस्था वइ धकाः तायेकाः कोइराला पक्षं नं राजीनामा स्वीकृत मयासे वार्ताया माध्यमं समस्या ज्यंकेगु रणनीति दयेकूगु सीदुगु दु।
थ्व हे दथुइ समस्या समाधानया नितिं मध्यमार्गीतय्सं विघटित भातृ संगठनया सभापतितय्त हे संयोजक यानाः तदर्थ समिति गठन यानाः अधिवेशन यायेगु धकाः प्रस्ताव हःगुयात तकं अस्वीकार यात धकाः संचार माध्यमय् पिहांवःगु खँ गलत खः धकाः स्वयं कोइरालां थौं सुथय् थःत नाप लायेत वःपिं कार्यकर्तातय्त जानकारी बियादीगु दु।