चीन घेरे जुइक सैन्य अभ्यास
भारतया सैन्य अभ्यासय् नेपाःया सेनां नं ब्वति काइगु
येँ (सन्ध्या टाइम्स)/संसारया दकलय् तःधंगु आर्थिक शक्ति जुइगु लँपुइ वनाच्वंगु चीनयात घेरे याये कथं भारतं चीनया चाकःलिं च्वंगु १६ गू देशलिसे मंकाः सैनिक अभ्यास यायेगु योजना न्ह्यःने हःगु दु। अले भारतलिसे उकथंया सैनिक अभ्यास यायेत सहमत जुइधुंकूगु देय्तय् धलखय् नेपाः नं लानाच्वंगु दु ।
विश्वय् अप्वयाच्वंगु आतंकवादलिसे ल्वायेत थज्याःगु मंकाः सैनिक अभ्यास यायेत्यनागु खः धकाः भारतं धाःसां सैनिक अभ्यास यायेत्यंगु देशतय् भूगोल स्वयेबलय् धाःसा उकिं थ्याक्क हे चीनयात घेरे यानाच्वंगु दइ ।
भारतीय सञ्चार माध्यमतय्सं बिउगु समाचार कथं भारतं थ्वहे वइगु अक्टोबर ९ निसें थ्व अभ्यास सुरु याइ। अले सन् २०१२ तकं जारी जुइ। थुकी भारतं अमेरिका, बेलायत, फ्रान्स लगायत चीनलिसे सिमाना स्वाःगु देय्त रुस, कजाखस्तान, मंगोलिया, उज्वेकिस्तान, किर्गिस्तान, बंगलादेश, म्यान्मार, नेपाल, सिंगापुर, इण्डोनेशिया, थाइल्याण्ड, माल्दिभ्स व सिसेल्सया सेनालिसे मंकाः अभ्यास याइ। थ्व अभ्यास मार्फत थुपिं १६ गू देय्या ११ लाख ३० द्वः सेनायात छथाय् तये फइगु आशा भारतं याःगु दु ।
आतंकवाद विरुद्ध ल्वायेगु लागिं जःलाखःला देय्त लिसे नं मिले जुयाः ज्या यायेत थज्याःगु पलाः ल्ह्वनागु धाःसां भारतं सैन्य अभ्यास यायेगु थ्व देय्तय् धलखय् भारतया जःलाखःला देय् पाकिस्तान व चीनया नां धाःसा दुमथ्याः।
थुकी जंगल, पहाड, हिमाल व मरुभूमिइ सैन्य अभ्यास जुइ। लिसें थुकी 'गुरिल्लालिसे गुरिल्ला थें हे जुयाः ल्वायेगु' अभ्यास जुइगु खँ नं धाःगु दु ।
थ्व सैन्य अभ्यासय् नेपाः नं सहभागी जुइगु खँ भारतं धाःगु दु। नेपाः व बंगलादेशलिसे मेगु महिनां निसें अभ्यास सुरु जुइगु खँ नं धाःगु दु। तर थौंकन्हय् नेपालय् माओवादीलिसे जुयाच्वंगु शान्ति सम्झौता कथं नेपाःया सेनां अज्याःगु ज्याय् ब्वति काये जिउ लाकि मजिउ धइगु खँ पिहां वइगु सम्भावना ब्वलंगु दु ।
