नेवा: सम्पर्क समूह रामेछापया १८ क्व:गु स्थापना दिवस
नेवा: सम्पर्क समूह भीरपानी पकरबास रामेछापया १८ क्व:गु स्थापना दिवसया उलेज्या छगू समरोहया दथुइ नेवा: देय दबूया नाय: भाजु नरेश ताम्रकारजुं त्वाःदेवाःय् मत च्याका यानादिल । येँया ईन्द्रेणी पार्टी पालेसय् जूगु उगु ज्याझ्वः समुहया नायः भाजु हरीबहादुर श्रेष्ठया नायसुइ जूगु खः ।
रामेछाप जिल्लां संविधान सभाय् निर्वाचित सभासद् भाजु तारा नारायण श्रेष्ठयात मूपाहाँ नेवाः देय् दबूया नायः भाजु तामाकारं दोसल्ला न्ययेका हनादीगु ज्याझ्वलय् थुगुसी एस.एल.सी.ताःलाःपिं रामेछाप भीरपानी पकरबासं येँय् वयाःच्वंगु परिवारया दुजःपिंत नं हना पौ लःल्हानादीगु ख: ।
सभासद् तारा नारायण श्रेष्ठं 'नेवाःतय्गु पहिचान धइगु तःधंगु खँ खः, नेवाःतय्त कायर धकाः प्रचार यायेगु कुतः यानाच्वंगु दु, वास्तवय् नेवाःत कायर मखु राजा पृथ्वी नारायण शाहया किजाया मिखा तःछ्याय् फुपिं, मुखियार कालु पाण्डेयात स्यायेफुपिं नेवाःत बहादुर व इमान्दारिपं खः' धयादिल ।
मूपाहाँ भाजु ताम्राकारं ''नेवाःत थःगु पहिचान दुगु नेवाः राज्य कायेगु निंतिं छप्पं व छधी जुइमाःगु व नेवाः राज्य दुने व पिनेया नेवाः धकाः विभेध याये मज्यू धयादिसें नेवाःत न्ह्याथाय् च्वंसां नं थःगु पहिचान सहितया प्रतिनिधित्व कायमाः । नेवाः तय्गु पहिचान धयागु नेवाः भाय् व संस्कृति खः । उकियात ल्यंकाःतयेगु जिम्मेवारी नं नेवाः तय्गु हे खः'' धयादिल ।
जगत श्रेष्ठं लसकुस यानादीगु ज्याझ्वलय् टिकाराम श्रेष्ठ, केशव श्रेष्ठ, सीताराम श्रेष्ठ, राम बहादुर श्रेष्ठ, ज्ञानकुमार श्रेष्ठ, कृष्ण बहादुर श्रेष्ठ, सांघुटार नेवाः समाजया छ्यांजे उज्वल श्रेष्ठ नं ज्यझ्वलय भिंतुना बियादीगु खः ।
More Stories Like this
कन्याम इलामय् नेपालभाषा कक्षा न्ह्यात धिमे बाजं व भाषा प्रशिक्षण ज्याझ्वः क्वचाल थुर्पुय् स्वक्वःगु लाखे प्याखँ धेधेबल्ला ओखलढुंगाय् नेपालभाषा कक्षा क्वचाल नेवाः देय् दबू ओखलढुंगा तदर्थ समिति स्वन
