ख्वपय् इसास ज्याझ्वःया तयारी

ख्वप(सन्ध्या टाइम्स)/ ख्वप नगरपालिका वडा नं.१ सूर्यमढी त्वालय् वइगु कौलाथ्व एकादशी कुन्हु जुइगु इन्द्रणी सांस्कृतिक समाजया झिंछक्वःगु साहित्य सम्मेलन व सांस्कृतिक ब्वज्या ताःलाकेत थीथी तयारी न्ह्यात। तयारीया झ्वलय् अभिमन्यू नापितया संयोजकत्वय् ग्वसाः खलः नीस्वंगु दु। उकी कान्छा स्यामा ब्यवस्थापन समितिया संयोजक जुयादीगु दु। अथेहे प्रचार प्रसार समितिया संयोजकय् कृष्णप्रसाद प्रजापति 'ख्याजू' च्वनादीगु दु। नापं राम कुसी आर्थिक समितिया संयोजक कथं ल्यःगु दु।
उकुन्हु जुइगु साहित्य सम्मेलनय् न्हाप, लिउ व लियां लिउ लाःगु बाखं व चिनाखँयात सिरपाः बीगु यानाः सन्देश प्रजापतिया संयोजकत्वय् साहित्य समिति ल्यःगु दु। अथेहे सांस्कृतिक संयोजकय् निकिता कासिछ्वा च्वनादीगु दु। स्वयम सेवक उपसमितिइ विशाल प्रजापति च्वनादीगु खःसा ग्वसाः खलःया मुँज्यां उकुन्हु न्हिनय् साहित्य सम्मेलन यायेगु व बहनी ७ ताः इलंनिसें सांस्कृतिक ब्वज्या यायेगु क्वःछिउगु दु।