अंशबन्डा व पारपाचुके बारे परामर्श ज्याझ्वः
येँ(सन्ध्या टाइम्स)/दी शाक्य फाउन्डेशन नेपालया मिसा पुचःया ग्वसालय् नकतिनि हे नःघःया प्रभात मा.वि.इ नेवाः समाजय् खनेदुगु थीथी कथंया कानुनी समस्या व उकिया निराकरण सम्बन्धी कानुनी परामर्शया छगू ज्याझ्वः जुल।
ज्याझ्वलय् थौंकन्हय् ल्याय्म्हतय् दथुइ इहिपा लिपा ब्वलनीगु अंशबन्डा व पारपाचुके सम्बन्धी समस्या व उकिया कानुनी प्रक्रिया बारे जानकारी बीगु ज्या जूगु खः। इहिपा धुंकाः विसंगतिया रुपय् ब्वलनाच्वंगु अंशबन्डा व पारपाचुकेया
बारे अधिवक्ता विजयराज शाक्यं आधारभूत कानुनी उपचार सम्बन्धी जानकारी बियादीगु खः।
थुकियालिसें वय्कलं ज्याझ्वलय् सहभागीतय्सं अन प्रकट याःगु थीथी कथंया कानुनी समस्या व जिज्ञासायात कयाः नं समाधानया उपाय मालेगु बारे सल्लाह बियादीगु खः।
उगु हे ज्याझ्वलय् मय्जु सुमन शाक्यं कानुनी ज्ञानया अभावं समाजय् थीथी कथंया समस्या ब्वलनाच्वंग दु धासें कानूनया महत्वया विषयय् न्ववानादिल।
अथे हे फाउडेशनया नायः जनक नेवाः शाक्यं थौंया परिवर्तित इलय् समाजय् बुद्ध वचनया अनुशरण यात धाःसा जीवन साकार यायेत अःपुइगु खँ कनादिल।
फाउन्डेशनया न्वकु चन्द्रबहादुर शाक्य व मू छ्यांज्ये अमीरमान शाक्यपिनिगु नं उपस्थिति दुगु उगु ज्याझ्वलय् मू दुजः रेणु बुद्धाचार्य व समाजसेवी गुहेरत्न शाक्यपाखें पाहांयात बौद्ध चैत्य लुमंति चिं कथं लःल्हानादीगु खः।
