थौं रक्षामन्त्री विरुद्ध वैद्य पक्षया प्रदर्शन
देश कुचा यायेगु अभिव्यक्तिया विरोध
येँ(सन्ध्या टाइम्स)/एकीकृत माओवादी दुने लाईन संघर्ष तिब्र जुया वनाच्वंगु इलय् उपाध्यक्ष मोहन बैद्य किरण पक्षं थौं सनिलय् थःगु हे पार्टीया नेतृत्वय् दुगु सरकारया रक्षामन्त्री शरदसिंह भण्डारी विरुद्ध सतक प्रदर्शन याइगु जूगु दु ।
माओवादीया अखिल क्रान्तिकारी, किसान महासंघ, महिला संघ, क्रान्तिकारी पत्रकार संघ, ट्रेड युनियन, बुद्धिजीवी, उद्योग व्यापार महासंघ, कर्मचारी, जातीय क्षेत्रीय महासंघ, दलित, शिक्षक, बेपत्ता परिवार, जनस्वास्थ्यकर्मी, सांस्कृतिक संघ नापं झिंन्यागू जातीय व जनवर्गीय संगठनतपाखें थौं यलया जावलाख्यलं मंकाः जुलुस पिकयाः उगु प्रदर्शन यायेत्यंगु खः ।
बैद्य पक्षं थौं हे स्वनिगलय् च्वंगु थःगु पक्षया कार्यकर्ता जक मुंकाः यलय् छगू तःधंगु प्रशिक्षण ज्याझ्वः नं यायेत्यंगु दु। उगु ज्याझ्वः क्वचायेकाः अनं तुं रक्षामन्त्री भण्डारीयात बर्खास्त यायेमाः धइगु माग यासें सतकय् विरोध प्रदर्शन यायेगु ज्याझ्वः दयेकूगु खः ।
रक्षामन्त्री भण्डारीं वंगु सोमवाः जक मधेसतय्गु मागयात संवोधन मयात धाःसा मधेसया २२ गू जिल्ला नेपालं ब्यागलं च्वनी धकाः अभिब्यक्ति बियादीगु खः। रक्षामन्त्री भण्डारीया उगु अभिव्यक्तियात कयाः प्यखेरं तीव्र विरोध जुयाच्वंगु दु। थ्व झ्वलय् स्वयम् सरकारया नेतृत्व यानाच्वंगु माओवादीया वैद्य पक्षं विरोध प्रदर्शन तकं यायेत्यंगु खः ।
थ्व हे दथुइ माओवादीया झिंन्यागू जनवर्गीय व जातीय संगठनतय्सं थौं मंकाः विज्ञप्ति पिथनाः रक्षामन्त्री भण्डारीयात बर्खास्त यायेत माग याःगु दु ।
प्रधानमन्त्री डा. बाबुराम भट्टराईं थःगु नेतृत्वय् सरकार दयेकूगु इलय् मधेसवादी मोर्चालिसे प्यंगू बुँदाया राष्ट्रघाती सम्झौता याःगु धकाः बैद्य पक्षं द्वपं बिया वयाच्वंगु हे इलय् रक्षामन्त्रीपाखें थज्याःगु अभिब्यक्ति वःगुलिं उकिया विरोधय् थौं प्रदर्शन यायेत्यंगु खः ।
वर्तमान सरकार नाप स्वापू तयाः बैद्य पक्षं यायेत्यंगु थ्व निक्वःगु विरोध प्रदर्शन खः। थ्व स्वयां न्ह्यः शिविरय् तयातःगु कन्टेनरया ताःचा लःल्हाःगु विरोधय् नं बैद्य पक्ष सतकय् कुहां वयाः प्रदर्शन याःगु खः ।
