पर्यटन दिवसया सार्थकता

कृष्ण प्रजापति
नेपाः छगू पर्यटकीय गन्तब्य स्थल खः धइगु विश्व न्यंकं प्रचार यायेमाःगु थ्व इलय् लाक्क हे बाध्यतां झीसं सुरक्षित धाःगु बुद्ध एयरया विमान दुर्घटना स्वये मालाच्वन।

थौं विश्व पर्यटन दिवस। विश्वन्यंकं थीथी कथं पर्यटन दिवस हनाच्वंगु ई। नेपाः नं पर्यटकीय गन्तब्य स्थल जूगुया ल्याखं न्हिं द्वलंद्वः पर्यटक थन वयाच्वंगु दु। अथे खःसां थन शान्ति, सुब्यवस्था व सुरक्षाया कारणं धाःसा न्ह्याबलें हे उपिं सशंकित नं जुइ मालाच्वंगु दु। विश्व पर्यटन दिवसया प्यन्हु न्ह्यः जक राजधानी लिक्क पर्यटकत तयाः ब्वयेका यंकूगु बुद्ध एयरया छगः विमान दुर्घटना जूगु समाचारं नेपाःया पर्यटन ब्यवसायय् तकं लिच्वः लायेफुगु अनुमान उगु लागाया मनूतय्सं यानाहःगु दु। नेपाः भौगोलिक ल्याखं नं तसकं जोखिमपूर्ण थाय् खः। अथे खःसां थनया प्राकृतिक व सांस्कृतिक सम्पदा विश्वय् हे नामूद जुयाच्वंगुलिं थन पर्यटकत उलि हे आकर्षित जुयाच्वंगु दु। थज्याःगु इलय् मौसम सम्बन्धी जानकारी हे मतसे जहाज ब्वयेकेगु लिसें पूर्व सतर्कता मकाइगु कारणं थज्याःगु दुर्घटनात बरोबर जुयाच्वंगु दु।
उगु हे लागाय् झिदँ ति न्ह्यः नं छगः तग्वःगु जहाज दुर्घटना जुयाः आपालं मनू सीगु खः। पहाडी भूबनौट, मौसम खराबी व चालकतय् लापर्वाहीया कारणं हे थज्याःगु दुर्घटना जुया वयाच्वंगु दु। अथे जुइवं नेपाःया पर्यटन क्षेत्रय् हे बांमलाःगु लिच्वः लायेफुगु खँ सम्बन्धित पक्षं इलय् हे ध्यान तयेमाःगु खनेदु। नेपाः उलि उब्जनशील जग्गा दुगु थाय् नं मखु। मेमेगु उद्योग धन्दा नं उलि ब्वलने फइगु सम्भावना मदु। मेगु स्वयां थ्व देय् पर्यटन उद्योग हे विकास यायेफइगु सम्भावना दुगु थाय् जूगुलिं गुलि फत उलि हे झीगु देशय् विदेशी उच्च गुणस्तरया पर्यटकत हयाः ब्यापार ब्यवसाय अप्वयेकेमाःगु थाय् खः। तर झीगु लापर्वाही व अनैतिक गतिविधिया कारणं विश्वय् नेपाःयात बांलाःगु मिखां स्वयेगु स्वयां थ्व देश असुरक्षित व जीवन रक्षा याये मफुगु देश कथं म्हसीकेफुगु सम्भावना नं अप्वया वनाच्वंगु दु। गबलें विदेशी नागरिकत हे तनीगु, गबलें लुटपात जुइगु व गबलें आः थें हे जहाज दुर्घटना जुइगु जक समाचार वयाच्वन धाःसा थन पर्यटक पाः जुइगु नं निश्चित दु।
पर्यटन विकासया लागिं सरकारी स्तरं हे पूर्वाधारत तयार यानाः उकियात लागू यायेगु निंतिं थीथी राजनीतिक पार्टी, जिविस, गाविस व स्थानीय निकायतय्त परिचालन यायेमाःगु खः। तर झीथाय् नेपाल भ्रमण वर्ष हनेगु धाःसां वा पर्यटन वर्ष धकाः नाय्खिं च्वयेकूसां अले विश्व पर्यटन दिवस हे हनेज्या जूसां उकथंया पूर्वाधार तयार यानाः ज्या यायेगु परिपाटी विकास जुइफुगु मदु। वास्तवय् झीथाय् पर्यटकत दुहां वइगु धइगु हे थनया कला, संस्कृति अवलोकन यायेत खः। थनया देगः, फल्चा व थीथी प्याखंत स्वयेत खः। अले प्राकृतिक सम्पदा हिमाल, पहाड व जंगलय् दुपिं जनावरत स्वयेत खः। विश्व सम्पदाया धलखय् नं थज्याःगु हे पर्यटकतय्त आकर्षक याइगु कथंया राष्ट्रिय निकुञ्जत नापं स्वनिगः व लुम्बिनीया अजूचायापुगु मानव निर्मित सांस्कृतिक धरोहरयात हे सम्पदा कथं दुथ्याका तःगु दु। संयुक्त राष्ट्र संघीय विज्ञत व शिक्षा स्वइगु निकाय युनेस्कों थज्याःगु नेपाःया अत्यन्त मौलिक व आकर्षक सम्पदायात विश्व सम्पदाया धलखय् दुथ्याकुसांनिसें हे झीगु देश चायेकं वा मचायेकं बुलुहुँ पर्यटकीय गन्तब्य स्थल कथं विकास जुजुं वयाच्वंगु खः।
थौं विश्व पर्यटन दिवस कुन्हु लाक्क हे बुद्ध एयरया झिंगुम्ह हवाई यात्रुतय् लाश दहन याये मालाच्वंगु इलय्, थीथी थासय् भ्रमण यानाच्वंपिं पर्यटक अपहरण व हत्याया समाचार पिहां वयाच्वनीगु इलय् अले थन बन्द व हडतालत जुयाः कृत्रिम यातना भोगे यायेत नं बाध्य जुयाच्वनीगु इलय् झीगु पर्यटन लागा गथे विकास जुइफइ? पर्यटकतय्गु सुरक्षा, सुविधा व अमन चयनया लागिं विशेष ब्यवस्था याये मफुतले झीगु देशय् पर्यटकतय् ल्याः अप्वयेके नं फइमखु। खय्त ला न्हापा लिपा स्वयां थुगुसी छुं भचा पर्यटक अप्वः दुहां वःगु पर्यटन ब्यवसायीतय् दावी दु। अथे खःसां म्हिगःया तुलनाय् जक अप्वः जूगुयात उपलब्धी तायेकेगु थाय् मदु। अप्रत्याशित रुपं हे अप्वयेके फत धाःसा हे जक पर्यटन वर्ष न्यायेकागु सार्थक जुइ। मखुसा सरकारी स्तरं बजेट हे विनियोजन यानाः स्थानीय निकायतपाखें थीथी ज्याझ्वः याकाः पर्यटन दिवस न्यायेकेगु काइदा ठेकेदारतय्त ज्या ठेकां बियाः थः दोष मुक्त जुइगु थें जक जुइ। उकिं वास्तविक रुपं देय्या पर्यटन विकासय् तिबः बी फइ हे मखु।
सांस्कृतिक नगर कथं नांजाःगु ख्वप देय्यात राज्यस्तरं हे सांस्कृतिक नगर घोषणा यायेगु खँ गुक्वःगु पञ्चवर्षीय योजनाय् छक्वः दुथ्याकूगु खः। थौं स्वयां झिंच्यादँ न्ह्यवंनिसें पर्यटन सेवा शुल्क म्हयाः पर्यटकतय्त सेवा, सुविधा विस्तार यायेगु ज्या याना वयाच्वंगु ख्वप नगरय् हे माक्व पर्यटक दुहां वयाच्वंगु मदु। तुलनात्मक ल्याखं थगुने स्वयां थुगुसी छुं भचा पर्यटक अप्वःगु रेकर्ड दुसां पर्यटन वर्ष हनागुयात सार्थक जुइकथंया ल्याः धाःसा अझ नं मदुनि। नेपालय् आः नकतिनि हे जक द्वन्द्व अन्त्य जुयाः शान्ति सम्झौता कथं देय् न्ह्यानाच्वंगु कारणं ध्वस्त जूगु पर्यटन लागायात विकास यायेत छुं ई काइगु निश्चित खः। अथे खःसां प्रचार यन्त्रयात सवल यानाः दोषरहित वातावरण तयार याना वने फत धाःसा थौं मखुसा कन्हय् झीगु देशय् पर्यटक अप्वयेके फइगु सम्भावनायात इन्कार याये फइ मखु। नेपाः छगू पर्यटकीय गन्तब्य स्थल खः धइगु विश्व न्यंकं प्रचार यायेमाःगु थ्व इलय् लाक्क हे बाध्यतां झीसं सुरक्षित धाःगु बुद्ध एयरया विमान दुर्घटना स्वये मालाच्वन।
थीथी राजनीतिक पार्टीतय्सं ला दछि न्ह्यः हे 'पर्यटनया लागिं नापं' धइगु नारा थ्वयेकाः पर्यटन वर्षजःछि बन्द हडताल याये मखु धकाः खुला मञ्चय् च्वनाः पाः फःगु खः। तर उमि भातृ संगठन व थीथी निकायपाखें बन्द हडताल यायेगु धाःसा मदिकू। छम्ह मनू सित धाःसां बन्द यायेगु कुसंस्कार नेपालीतय्के विकास जुयाच्वंगु दु। थ्व गलत प्रवृत्तिं यानाः नं झीगु देशय् पर्यटक आगमनय् छुं भचा जूसां अवरोध वयेफुगु सम्भावना दु। अथे जुयाः नं झीगु देशय् जक मखु विश्वन्यंकं २७ सेप्टेम्बर कुन्हु हनीगु विश्व पर्यटन दिवस झीगु देशय् नं सार्थक रुपं हनेगु खःसा छम्ह पर्यटकयात छफ्वः स्वां बियाः वा तपुलिं पुइकाः सम्मान यायेगु थेंज्याःगु औपचारिक ज्याझ्वःत यानाः जक मखुसें आः फुक्कं पर्यटकतय्त हे लय्तायेकाः उमिगु दां झीथाय् खर्च यायेगु सहज वातावरण ज्वना हाकनं थन वयेगु मतिं व प्रतिवद्धता क्यने फइगु कथंया वातावरण तयार यायेगुली झी सकलें लगे जुइमाः।

More Stories Like this