खाद्यान्न गोदाम शिलबन्दी

वाणिज्य व आपूर्ति मन्त्री थः हे अनुगमनय् वन
येँ(सन्ध्या टाइम्स)/सरकारी अनुगमन पुचलं थनया कुलेश्वरस्थित निगू खाद्य गोदामय् शिलबन्दी याना बिउगु दु।
वाणिज्य व आपूर्ति मन्त्री लेखराज भट्टलिसें वाणिज्य विभागया अनुगमन पुचलं कुलेश्वरया विनायक स्टोर व सन्तोष खेतानया नामय् दुगु गोदाम शिलबन्दी याना बिउगु खः। मन्त्री सहितया विभागीय पुचः अनुगमनया निंतिं वःगु खँ सीवं स्टोरया संचालक भ्वं काः वनेगु त्वहः चिनाः बिसिउँ वंगु व मेगु गोदामया संचालक नाप मफयेवं उकियात नं शिलबन्दी यानागु अनुगमन पुचलं न्ह्यथंगु दु।
निगुलिं गोदामया संचालकतय्त स्वन्हुया दुने विभागय् उपस्थित जुइत पौ च्वयेगु ज्या जूगु अनुगमन पुचलं न्ह्यथंगु दु। बजाः अनुगमन यायेगु झ्वलय् उगु पुचलं व हे थासय् च्वंगु श्यामबाबा स्टोर, मोहित स्टोरय् बजाः भाःया धलः तयामतःगु, गोदामया खाद्यान्नय् लेबल तयामतःगु व तौल नं म्हो जूगु धासें आवश्यक भ्वं सहित स्वन्हुया दुने विभागय् उपस्थित जुइत निर्देशन बिउगु दु।
वंगु छुं दिं न्ह्यव जक वाणिज्य व आपूर्ति मन्त्री भट्टं खाद्यान्न अभाव याइपिं, अखाद्य पदार्थ ल्वाक छ्याइपिं, कृत्रिम अभाव सिर्जना याइपिंत तत्काल कारवाही यायगु नापं नखःया इलय् उपभोग्य ज्वलंया अभाव मजुइमा धइगु ल्याखं थः हे बजाः अनुगमनया निंतिं वनेगु जुइ धकाः धाःगु खः।
अनुगमनय् वंम्ह मन्त्री भट्टं गोदाम संचालकयात कारवाही यायेगु नापं गोदाम शिलबन्दी यायेत निर्देशन बिया दीगु खः। अनुगमन लिपा मन्त्री भट्टं विद्यमान दक्वं कानुन कार्यान्वयनय् हयेगु व उकिं नं मगात वा आवश्यक जुल धाःसा मेगु कानुन दयेकेत नं पहल यायेथगु जुइ धकाः संचारकर्मितय्त धयादीगु दु।
वय्कलं उपभोक्ता अदालतया ज्या न्ह्याये धुंकूगु नं धयादीगु दु।