जागरण मञ्चया ध्यानाकर्षण

येँ(सन्ध्या टाइम्स)/गुणस्तहीन व दूषित खाद्य पदार्थ उत्पादन याःगु द्वपनय् कर्नर ताजा गुँदपाक भण्डारया मदनबाबा मास्के व नरेन्द्र मास्केयात झिंप्यदँया सजाय माग यासें अदालतय् मुद्दा दायर यायेत्यंगु बुखँप्रति नेवाः जागरण मञ्चं थःगु गम्भीर ध्यानाकर्षण जूगु खँ धाःगु दु। मञ्चं थन छगू विज्ञप्ती जारी यासें वय्कःपिनिगुपाखें जूगु व खनेदुगु दोषया आधारत स्वयेबलय् इपिं दोषी ठहर जुयाः उकथं हे सजायया भागि जुल धाःसा विवेकसम्मत मजुइगु व अन्याय जूवनीगुलिं थुगु तथ्यय् जिमिसं थःगु सरोकार प्वंकुसें सः थ्वयेकाच्वना धयातःगु दु।
नेपाली समाजया परम्परागत कुरीति जक मखसे आधुनिक बेथितिं नं उत्तिकं राज यानाच्वंगु दु। थुकीया विरुद्ध जिपिं स्वयं पीडित व संघर्षरत नं जुयाच्वनागु दु। तर गुगुं नं बेथितिया अन्त्य यायेगु कुतलय् "ब्यांचिया तं छुँयात" धायेथें घाः लाकेगु मनशाय तःगु खःसा व स्वयं हे बेथितिया श्रृंखलाया मेगु कडी जक जूवनीगु निश्चित दु।
शक्ति व पहुँच दुपिं मनूतय्सं उकीया हे भरय् खुल्ला रुपं मभिंगु ज्या यानावनेगु अले शक्ति व पहुँच मदुपिं मनूत चीधंगु गल्ती व दोषया नं तःधंगु सजायया भागिदार जुइगु, प्रशासनपाखें नं अनेक कथं शोषित व पीडित जुइगु अवस्था जिमिसं खनाच्वनागु दु। थुकीयालिसें राजनीतिक व प्रशासनिक स्तरं थःगु असक्षमता सुचुकेगु कानूनय् जक कडा कारबाहीया व्यवस्था यानाः "यानागु दु" धासें क्यनेगु प्रवृत्ति दु।
अथे हे उगु विज्ञप्तीइ धयातःगु दु, उकिं हाकु बजाः, म्हो गुणस्तरया खाद्य पदार्थ, मिसावट, अस्वास्थ्य वातावरणय् खाद्यवस्तुया उत्पादन लगायतया विषयलय् नेपाल सरकारं यानाच्वंगु अनुगमन व कारबाहीया ज्याझ्वःयात लसकुस यासें द्वपं लाःपिंत विवेकसम्मत रुपय् जक सजायया भागिदार याकेमा धयागु माग यानाच्वना। थुकीयालिसें थुगु ज्याझ्वः प्रशासनय् च्वनाच्वंपिं सुं नं अले सुयागुं लागिं मेगु चिन्ताया विषय मजुइमा धकाः सचेत नं याकाच्वना।