'माओवादी दुने लोकतन्त्र कमजोर जुल'

येँ(सन्ध्या टाइम्स)/एकीकृत माओवादीया पोलिटब्यूरो दुजः राम कार्कीं मेमेगु थासय् लोकतन्त्रया खँ ल्हाइपिं माओवादी पार्टी दुने हे लोकतान्त्रिक पद्धति कमजोर जुल धयादीगु दु।
शान्ति प्रकृया लिपा माओवादीया नेतातय्त नैतिकताया संकट खने दयावःगु दु धासें वय्कलं थः बाबुराम भट्टराईया पूर्णकालीन समर्थक व विरोधी मखु धकाः स्पष्ट यानादिल। थौं सुथय् क्रान्तिकारी पत्रकार संघं तानसेनय् याःगु पत्रकार सम्मेलनय् न्ववासें वय्कलं धयादिल 'माओवादी नेतृत्वं मेमेगु थासय् लोकतन्त्रया खँ ल्हाना जुइ तर थःगु हे पार्टीं धाःसा उकियात नाला काइ मखु। बहस जुइगु जायज खः, तर नेतृत्वं उकियात सही कथं हल याये फयेमाः।' थः आः तकं छुं नं विचार समूह दुने मदु धासें वय्कं धयादिल 'माओवादी पार्टी तःधं व क्रान्तिकारी जूगुलिं न्ह्यागु याःसां तःधंगु तरंग हइ, कन्टेनरया ताःचा लःल्हाःगु विवाद नमूना जक खः।'