भ्रमण भत्ता भुखाचं पीडित जूपिंत

येँ(सन्ध्या टाइम्स)/नकतिनि अमेरिकाया न्यूयोर्क भ्रमण यानाः लिहां झाःम्ह प्रधानमन्त्री डा. बाबुराम भट्टराईनं उगु भ्रमणपाखें थःत वइगु भत्ता फुक्कं भुखाचं पीडित जूपिनि राहतया ज्याय् खर्च याइगु जूगु दु। उगु भ्रमणपाखें प्रम भट्टराईयात मुक्कं १ लाख ७६ द्वः व ३७४ तका दां प्राप्त जूगु खः। उगु दांयात वय्कलं भूकम्पपीडित राहत कोष मार्फत भुखाचं जनधनया क्षति जूपिंत उपलब्ध याकेगु जुइ धकाः घोषणा यानादीगु खँ प्रमया स्वकीय सचिव विश्वदीप पाण्डें कनादिल।
उकथं हे अमेरिकाय् च्वंम्ह थः गुरुमां एल्नरं पकेट खर्च कथं बियादीगु ५०० डलर व अन हे च्वनाच्वंम्ह नेपाःमि अर्जुनप्रसाद मैनालीं बियादीगु १५०० डलर दां नं वय्कलं भुखाचं पीडितपिंत हे बीगु खँ नं धयादीगु दु।
थ्वहे झ्वलय् प्रधानमन्त्री बाबुराम भट्टराई थौं सुथय् पार्टीया अध्यक्ष प्रचण्ड व उपाध्यक्ष मोहन वैद्यया छेँय् झायाः निम्हेसितं अलग अलग नापलानादीगु दु।
उगु इलय् प्रम भट्टराईनं उपाध्यक्ष वैद्ययात विवाद थःके तुं तयाः पिने सार्वजनिक मयायेत इनाप यानादीगु खँ धाःगु दु। विवादयात आः च्वनीगु पार्टीया केन्द्रीय बैठकय् हे जक पेश यायेत इनाप यासें विवाद पिहां वंगु कारणं कार्यकर्तायात बांमलाःगु लिच्वः लानाच्वन धकाः नं प्रम भट्टराईं धयादीगु खः।