इनरुवाय् बन्द व तोडफोड

फैजलया हत्या विरुद्ध मुस्मांतय् प्रदर्शन, येँय् शवयात्रा
येँ(सन्ध्या टाइम्स)/म्हिगः न्हिनय् येँया घण्टाघर लागाय् कडा सुरक्षाया दथुइ हे इस्लामिक संघया महासचिव फैजल अहमदयात गोलीं कयेकाः स्यानाः बिउगु विरोधय् थौं सुथंनिसें सुनसरीया निगू राजमार्गय् चक्का जाम याःगु दु।
सुनसरीया इनरुवाय् मुस्मां प्रदर्शनकारीतय्सं चक्का जामया झ्वलय् खुगः गाडी तोडफोड याना बीवं तनाव ब्वलंगु दु।
आक्रोशित प्रदर्शनकारीतय्गु जुलुसयात बेवास्ता याना वंगुलिं को. १ व ११२१, ना. ४ ख ३०८०, बा. ८ च ४२३५ व ना. ३ ख ३८४३ नम्बरया गाडी तोडफोड याना बिउगु दु।
प्रदर्शनकारीतय्सं ट्रकयात तकं नियन्त्रणय् कयाः लँ दथुइ हे बेथां दिकाः प्रदर्शन यानाच्वंगु दुसा ट्रक चालकयात तकं ल्हाः वायेगु ज्या याःगु दु। मुस्मांतय्सं शान्ति सुरक्षा बी मफुम्ह गृहमन्त्रीं राजीनामा बीमाःगु माग यासें उगु प्रदर्शन यानाच्वंगु खः।
मदुम्ह अहमदया सीम्ह हइगु अले अन्तिम संस्कार याइगु जुयाः सलंसः मुस्मांत उगु लागाय् मुनाच्वंगु खः। अहमदया जन्मस्थल सुनसरीया भोक्राहाया पूर्व-पश्चिम राजमार्ग व कोशी राजमार्गया दुहबी-सोनापुर लागाय् सुथंनिसें हे मुस्मांतय्सं सतकय् प्रदर्शन यानाः चक्का जाम याःगु दु। सुथंनिसें हे चक्का जाम याःगुलिं अन राजमार्गय् यातायात तकं ठप्प जूगु दु।
दोषीयात ज्वनाः कारवाही यायेमाःगु, पीडित परिवारयात क्षति पूर्ति बीमाःगु, मदुम्ह फैजलयात सहिद घोषणा यायेमाःगु, शान्ति सुरक्षाया व्यवस्था यायेमाःगु माग यानाः अथे सुथंनिसें हे प्रदर्शन यानाच्वंगु खः।
थुखे येँया घण्टाघर लागां मदुम्ह फैजलया सीम्ह क्वबियाः मुस्मांतय्सं शवयात्रा याःगु दु। सलंसः मुस्मांतय्सं ब्वति काःगु उगु शवयात्रा लिपा सीम्हयात सुनसरीइ हे यंकाः अन्त्यष्टि याइगु ग्वसाः दु।
येँय् शवयात्रा याये न्ह्यः मुस्मांतय्गु मस्जिदय् इस्लाम परम्परा कथं थौं सुथय् मदुम्ह फैजल अहमदयात म्वः ल्हुइकेगु ज्या याःगु दु। उगु हत्याकाण्ड लिपा म्हिगः जूगु वार्ताय् गृहमन्त्रीं मदुम्ह अहमदयात सहिद घोषणा यायेत थम्हं कुतः यायेगु बचं बियादीगु खः।
म्हिगः न्हिनय् वर्षादी पुना वःपिं निम्ह म्हमसिउपिं मनूतय्सं लिक्क हे वयाः वय्कःयात गोलीं कयेकाः स्याना बिउगु खः। स्याःपिंत थौं तकं ज्वने मफुनि।