बछि अनसनकारी अस्पताल भर्ना

येँ(सन्ध्या टाइम्स)/नेपाली कांग्रेसया भातृ संगठन विघटन याःगु विरोधय् अनसन च्वंपिं बछि स्ववयां अप्वः नेता कार्यकर्तात अस्पताल भर्ना यायेमाःगु अवस्था ब्वलंगु दु। अनसन च्वंपिं मध्ये तरुण दलया अध्यक्ष महेन्द्र यादव नापं १८ म्ह नेता कार्यकर्तात म्हं मफयाः थीथी अस्पतालय् भर्ना यायेधुंकूगु दु। ल्यं दनिपिं १४ म्ह अनसनकारीतय् अवस्था नं नाजुक जुयाच्वंगु दु। इमित नं चिकित्सकतय्सं अस्पताल भर्ना जुइत सुझाव बिउसां उमिसं धाःसा अस्वीकार यानाच्वंगु दु। छवाः न्ह्यःनिसें आमरण अनसन च्वनाच्वंपिं कांग्रेस कार्यकर्तातय्गु अवस्था झन झन गम्भिर जुया वनाच्वंगु दु। यादवयात आइसीयुलय् तयाः उपचार यानाच्वंगु दु। थ्व हे दथुइ थनिंनिसें नेपाल विद्यार्थी संघया नेता व कार्यकर्तात नं पार्टी कार्यालय सानेपाय् अनसन च्वनीगु जूगु दु।