
खुलाया दुने ज्यापु महागुथि संघीय संरचनाय्
येँ(सन्ध्या टाइम्स)/ज्यापु महागुथि खुलाया दुने संघीय संरचना कथंया सांगठनिक स्वरुप बियाः न्ह्याः वनीगु जूगु दु। म्हिगः बहनी क्वचाःगु ज्यापु महागुथिया निक्वःगु राष्ट्रिय तःमुँज्यां उगु स्वरुपया संगठन दयेकेगु कथं विधान संशोधन याःगु दु।
तःमुँज्यां राजभाई ज्यापुयात सर्वसहमतिं नायः ल्यःगु दु। सर्वसहमतिं हे ल्यःगु ४१ म्हेसिया केन्द्रीय समितिया न्वकु पदय् बेखानारायण महर्जन (उत्तर लागा), राजभाई महर्जन (पश्चिम), कुलबहादुर महर्जन (किपू), अष्टमान महर्जन (यल), धर्म मुनिकार (येँ), मूछ्यांज्ये अनुपसिंह सुवाल, छ्यांज्ये बाबुराजा प्रजापति, लिउ छ्यांज्ये गोपाल ज्यापु (येँ), गिरिधर डंगोल (यल), कृष्णबहादुर महर्जन (किपू), विकास महर्जन (उत्तर), देवकृष्ण महर्जन ( पश्चिम), दांभरि भक्तमान महर्जन व लिउ दांभरि मचाराजा महर्जनयात ल्यःगु दु।
तःमुँज्यां निर्देशन पुचःया कजि कथं राजभाई जकःमियात तःगु दुसा संरक्षकया रुपय् विपेन्द्र महर्जन, ई. मोहनकृष्ण डंगोल व देबबहादुर महर्जनयात ल्यःगु दु। नायः पदय् निर्वाचित जुयादीम्ह राजभाई ज्यापुं खुलाया दुने विशेष अधिवेशन यानाः महागुथिया सांगठनिक संरचना नेवाः स्वायत्त राज्यया अवधारणा कथं यंकेगु नापं लागा लागायापिंसं निश्चित ईया नेतृत्व यायेगु कथं विधानय् हे व्यवस्था यायेगु खुलाया दुने उज्वःगु व्यवस्था यायेगु जानकारी बियादीगु दु।
ज्यापु महागुथिया निक्वःगु राष्ट्रिय तःमुँज्या वंगु शनिवाःनिसें निन्हुयंकं जूगु खः।