मार्क्सवाद लाकि बुद्धवाद?

माओवादी दुने न्हूकथंया वहस

येँ (सन्ध्या टाइम्स)/एकीकृत माओवादीया अध्यक्ष प्रचण्डं तःक्वःमछि हे सार्वजनिक रुपं आः बुद्ध जुइमाःगु दु धकाः अभिब्यक्ति बीगु याना वयाच्वंगु अवस्थाय् पार्टीया महासचिव रामबहादुर थापा बादलं केन्द्रीय कमिटीया बैठकय् पार्टीया निर्देशक सिद्धान्त 'मार्क्सवाद खः लाकि बुद्धबाद खः?' धकाः एजेण्डा हे न्ह्यब्वइगु जूगु दु। प्रचण्डं थीथी राजनीतिक दलया नेतात नापलायेगु झ्वलय् नं आः थः बुद्ध दर्शनयात नाला वनेगु जुइ धया वयाच्वंगुलिं महासचिव बादलं थुकियात एजेण्डा हे दयेकाः सहलह ब्याकादीत्यंगु खः ।

माओवादीया सांस्कृतिक पुचः सामना परिवारया कलाकारतय्त थौं येँय् प्रशिक्षण बीगु झ्वलय् महासचिव बादलं धयादिल 'देय्या समस्या समाधान लुम्बिनी व बुद्धपाखें जुइगु खःसा आः झीगु पार्टीया निर्देशक सिद्धान्त नं मार्क्सवादया थासय् बुद्धवाद धकाः तयेमाल। उकिं जिं आः केन्द्रीय कमिटीया बैठकय् थुकियात एजेन्डा कथं यंकेगु जुइ ।'

वइगु शुक्रवाःनिसें न्ह्याइगु माओवादी केन्द्रीय कमिटीया बैठकय् वय्कलं उगु एजेन्डा यंकेत्यंगु खः। बैठकया मेमेगु एजेन्डा बारे जानकारी बिसें वय्कलं धयादिल, 'पार्टीया संयुक्त मोर्चा दलाल पुँजीपतितलिसे खः लाकि उत्पीडित वर्गलिसे खः धइगु विषययात कयाः नं सहलह जुइ।'
अध्यक्ष प्रचण्डं हे पार्टी तछ्यायेत्यंगु द्वपं बिसें वय्कलं धयादिल 'पार्टी तछ्याइम्ह हे दाहाल खः ।'

प्रचण्डं पार्टीयात जानकारी हे मबिसे क्यान्टोमेन्ट च्वंगु ल्वाभःया ताःचा लःल्हाःगु खः धासें महासचिव बादलं धयादिल 'सिलगुडी वंगु इलय् नं वय्कलं पार्टीयात जानकारी बियामदी। पारिवारिक भेटघाट जक धाल। पार्टी विरुद्धया चलखेलय् संलग्नता दुम्ह प्रचण्ड हे पार्टी तछ्यायेत सक्रिय जुयाच्वंगु दु। जिपिं ला पार्टीया लाइनं पिहां वनागु मदु। थम्हं न्ह्यःनेलाःथे पार्टीया संगठनात्मक पद्धति त्वःता जुइगु अले मेपिंत चलखेल यात धकाः द्वपं बिया जुइगु ला?'

मोहनि स्वन्तिया नं फुर्सद मकाइगु
मोहनि स्वन्ति नखःया इलय् नं शान्ति प्रक्रिया व संविधान निर्माणया ज्यायात धाःसा निरन्तरता बीगु जूगु दु। राष्ट्रसंघीय महासभाया ६६ क्वःगु बैठकय् ब्वति कयाः न्यूयोर्कं थौं येँय् लिहां झाःम्ह प्रधानमन्त्री डा. बाबुराम भट्टराईं संविधानसभाया अध्यक्ष सुवासचन्द्र नेम्वाङयात नापलानाः सहलह ब्याकुसें थ्व सहमति यानादीगु खः। वय्कःपिनि दथुइ सरकारी विदाबलय् नं शान्ति व संविधानया ज्या यायेगु सहमति जूगु खः ।

प्रम निवास वालुवाटारय् थौं सुथय् बाघौ जूगु उगु भेटवार्ताय् प्रम भट्टराई राष्ट्रसंघय् थम्हं यानागु औपचारिक व अनौपचारिक भेटवार्ता व उपलब्धि बारे नं संविधानसभा अध्यक्ष नेम्वाङयात जानकारी बियादीगु खः ।