ल्वाक छ्यानाः मीपिन्त कडा कारवाही यायेमाः

मोहनिया लसताय् पसलेतय्गु तःतःधंगु मोहनि न्ह्याइगु इलय् डर व त्रासया कारणं पसः तिनाः सुलाः सुलाः जुइमाःगु अवस्था वःगु दु । मोहनि व स्वन्ति नेवाःतय्गु नितिं जक मखु वल्कि फुक्क कथंया जात, जाति, धर्म, संस्कृतिया मनूतय्गु नितिं तःधंगु नखः खः । थ्व नखलय् माःगु हलंज्वलं न्यायेगु नं उतिकंहे जरुरी जुइ । तर छु सामानय् गुलि ल्वाक छयाना तःगु दु धयागु खँ थौं सुनां मस्यू । झीसं न्यानाः नयावयाच्वनागु गुलिखय् सामानय् नयेहे मज्यूगु हानिकारक वस्तुत ल्वाक छ्याना तःगु खँ जनसमक्ष वयेवं मिखा तिसिनाः वजारं सामान न्याना वयाच्वनापिं झीत ल्वाक ज्याःगु सामान न्यानाः झीसं झीगुहे स्वास्थ्य स्यंकाः वयाच्वनागु जक मखु, मदु मदु ध्यबा नापं स्यंकाः वयाच्वना । ध्यबा नं फुइगु, स्वास्थ्य नं स्यंकेगु थुगुकथं मूर्खता झीसं यानाच्वनागु दु । गुणस्तरहिन सामान म्यूगु वापत न्हय्गू कम्पनीतय्त वाणिज्य विभागं १४ दँया कैद सजाँय माग सहित जिल्ला अदालतय् मुद्दा न्ह्याके त्यंगु दु । थ्व मोहनि न्ह्यः जुइ लाकि मोहनि व सोन्ति लिपा धयागु खँ सीमदुनि ।

न्ह्यावले मुद्दा तःसां नेपाःया जनमानसय् तःधंगु थाय् काःगु मिसावतया विरुद्ध सरकारया छुं विभागत सकृय जुइगु धयागु उपभोक्तातय्त ताः ई निसें ठगय् यायेत पल्कय् थूपिं अपराधिक व्यापारीतय्त कारवाही न्ह्याके त्यंगु थ्वहे न्हापांगु पलाः जूगु दु । न्हू सतकया काठमाडौं गुँडपाख भण्डारंनिसें न्ह्याकूगु वजार अनुगमन यानाः शंखास्पष्ट समानयात ल्यावय् परिक्षण यानाः हानिकारण वस्तुत ल्वाक छ्यानातःगु धयागु खँ प्रमाणित जुइधुंकूगु प्रमाणित जुइ धुंकूगु न्हय्गू केशयात थुगु कथं कानुनया दायरा दुने हयेत जूगु पहलं लसकुस याये वहः जू । अथ्यला ल्वाक छ्याःगु वापत ज्वनाः कानुनी कारवाही न्ह्याकेगु खँ छुंनं कथं न्हूगु मखु । कानुन म्हिगः नं दु, थौं नं दु । नां जकया हे थजु अनुगमन म्हिगः नं जू, थौं नं जू । तर थौं गुणस्थिरहिन व दुषित खाद्य व पेय् पदार्थयात ज्वनाः कारवाही वनं अदालतीहे कारवाही धाःसा थौं जक जुल, म्हिगः म्हीग छाय् मजुल ? म्हिगः म्हीग नं ल्वाक छ्यानाः मिया वःगु खः । तर म्हिगः म्हीगः ल्वाक छ्याःसां उकियात सञ्चार ख्यलय् दुनेहे मवल व वहे वःसां कानुनी कारवाही जुइ न्ह्यः हे ध्यबा नकाः मिलय् यायेगु ज्या जुल । अनुगमन नं फ्यासुल । गुकिं यानाः ल्वाक छ्यानाः मीपिं पसलेतय्त हःपाः वीगु ज्या जक जुल थुकिं । नयेहे मज्यूगु अखाद्य वस्तु ल्वाक छ्यानाः नं धाइपिं सुं मन्त । ज्वनीपिं सुं मन्त । ज्वंहे ज्वन धाःसा कारवाही फयेम्वाल । व्यापार बांलाक न्ह्यानाहे च्वन ।

न्हूसतकया ताजा व पौष्टिक धयातःगु गुँडपाखयात अले जारय् लः तयाः मियावःगु लःयात खाद्य प्रविधि व गुण नियन्त्रण विभागया प्रयोग शालाय् परिक्षण याःवलय् उगु निगू थासय्या सामानय् नं स्वास्थ्यया नितिं तसकं हानिकारक किटाणुत दुगु खँ प्रमाणित जूगु दु । थ्वहे कारणं न्हू सतकय् उगु गुँडपाख पसले मदनवावा मास्के व नरेन्द्र मास्के, मिलन मास्के लगायत व्यक्तिपिनिगु विरुद्ध उगु विभागं मुद्दा न्ह्याकेत तयारी याःगु खः । तिरुपति मिठाइ, नक्ासालया केदार भोग मिठाइ, पेन्गुइन अक्वा कोल्र्ड व इभा ब्रान्डया लःया विरुद्ध मुद्दा तयेत्यंगु खः । कानुनकथं ३ दँ कैदया सजाँय वाहेक न्यय्द्वः न दां दण्ड पुइकेगु व्यवस्था दु । तर नं आम जनताया स्वास्थ्ययात दीर्घकालिन लिच्वः त्वःतीगु थुगुकथंया अपराधिक ज्याया नितिं विभागं १४ दँया कैद सजाँय माग यायेगु अस्वभाविक मखु । कानूनयात हिलाःसां थुगुकथंया अपराधीक ज्याय् कडा दण्डया व्यवस्था यायेहेमाः ।

More Stories Like this