'दलतय्सं यानाः संविधान निर्माणया ज्या दिनाच्वन’
येँ (झीगु स्वनिगः)
संविधानसभाया नायः सुवासचन्द्र नेम्वाङं मूमू आःया राजनीतिक दलतय्गु दथुइ ल्वापु जूगुलिं संविधान निर्माणया ज्या दिनाच्वंगु दु धकाः धयादीगु दु । दलत दथुइ शान्ति प्रक्रिया पूरा मजुइकं संविधान निर्माण यायेगु ज्याय् न्ह्याः मवनेगु पक्षय् दुगुलिं संविधानया मस्यौदा तयार यायेगु ज्या दिनाच्वंगु खः धकाः वय्कलं स्पष्ट यानादिल । ख्रीष्टियन प्रतिबद्धता पत्र राष्ट्रिय अभियानं लःल्हाःगु ज्ञापन पौ कायेगु झ्वलय् सभामुख नेम्वाङं धयादिल 'संविधान निर्माण यायेगु संविधानसभां आधार तयार याये धुंकूगु दु ।' आः दयेकीगु संविधानं फुक्क जनजाति, भाषा व धर्मया सम्मान याइ धकाः नं धयादिल ।
अथे हे ख्रीष्टियन प्रतिबद्धता पत्र राष्ट्रिय अभियानं म्हिगः आइतवाः हे राष्ट्रपति डा. रामवरण यादव, उपराष्ट्रपति परमानन्द झा, प्रधानमन्त्रीया ज्याकू, सभाध्यक्ष नेम्वाङ, संवैधानिक समितिया सभापति निलाम्बर आचार्ययात नं ज्ञापन पौ लःल्हाःगु खः ।
