विमान दुर्घटनाय् १९ म्ह मन्त

येँ (झीगु स्वनिगः)

बुद्ध एयरया नाइन एन—एइके कसलाइनया १९०० डी विमान म्हिगः आइतवाः सुथय् खराब मौसमया कारणं यल जिल्लाया विशंखुनारायण गाविस व लामातार गाविसया दथुइ लाःगु कोटडाँडा धैगु थासय् दुर्घटना जुयाः उगु विमानय् दुपिं फुक्क १९ म्ह हे मनूत सीगु दु । सुथय् ८ बजे जुयाः ५० मिनेट वंगु इलय् अथे दुर्घटना जूगु खः धकाः नागरिक उड्डयन प्राधिकरणं धाःगु दु । सुथय् ६ बजे जुयाः ४९ मिनेटय् येँया त्रिभुवन अन्तर्राष्ट्रिय विमानस्थलं ब्वयाः वंगु उगु विमान ७ बजे जुयाः ३१ मिनेट वंगु इलय् सम्र्पक विहिन जूगु खः । १४ दँया उड्डयन इतिहासय् थ्व बुद्ध एअरया विमान दुर्घटना जूगु न्हापांगु खः ।

उगु दुर्घटना जुयाः विमान ध्वस्त हे जूगु दुसा मनूतय्गु सीम्ह तकं क्षत विक्षतय् अवस्थाय् लुयावःगु खः । उगु दुर्घटनाय् लानाः निरञ्जन कर्माचार्य सिकिस्त अवस्थाय् उद्धार याःगु खःसां वासः यायेत अस्पतालय् यंकाः च्वच्वं लँ दथुइ हे सीगु खः । दुर्घटनाय् लानाः मेपिं झिंच्याम्ह मनूत घटनास्थलय् हे सीगु खः । उगु दुर्घटनायात कयाः छानविन यायेगु नितिं नागरिक उड्डयन प्राधिकरणया पुलांम्ह महानिर्देशक राजेशराज दलीया संयोजकत्वय् स्वम्हेसिया छानवीन पुचः दयेकूगु दुसा दुघटना जूगु लागाय् हे विमानया ब्ल्याक बक्स लुयावःगु दु ।

दुर्घटनाय् लानाः मदुपिं

क्याप्टेन जनबुद्ध ताम्रकार, सहचालक पी अधिकारी, विमान परिचारिका अस्मिता श्रेष्ठ, निरन्जन कर्माचार्य -वासः यायेत यंकूगु इलय्), शारदा कर्माचार्य , जगजन कर्माचार्य भारतया नागरिकत पंकज मेहता, छाया मेहता, एच डी नागराजा, एल नागराज, आई नागराज, एस नागराज, डी. तामोसुबिं्रयम, नागराज तालोसुबि्रयम, पी तालो सुबि्रयम, तेस्रो मुलुकया देय् म्हसीके मफुपिं एन्ड्रे वेइड, मिस नाताली नेइलन व तोशिनोरी क्वेज्म